काठमाडौँ, ३ माघ । निर्वाचन आयोगले मतदाता नामावलीको अनलाइन प्रारम्भिक दर्ता आज मङ्गलबारदेखि सुरु गरेको छ । आयोगले सोमबारदेखि नै अनलाइन दर्ता सुरु गर्ने भनेको थियो तर सोमबार राष्ट्रिय शोक बिदा परेकाले आजबाट दर्ता शुरु भएको हो ।

आयोगका सहायक प्रवक्ता ऋषिराम भुसालका अनुसार मङ्गलबारदेखि ७७ वटै जिल्लामा अनलाइन दर्ता सुरु भएको छ । प्रारम्भिक दर्तासँगै नामावली स्थानान्तरण, मतदाता नामावली अद्यावधिक, बसाईसराई र विवाह गरी जानेहरुको ठेगाना सचाउने कार्यसमेत सँगै सुरु हुने उनले बताए ।

यसअघि बायोमेट्रिक भोटर्स रजिस्ट्रेसन सिस्टम (बीभीआईआर)मार्फत नामावली दर्ता हुँदै आएकोमा प्रणालीलाई स्तरोन्नति गरेर मोबाइलबाटै आफ्नो विवरण राख्न मिल्नेगरी प्रारम्भिक दर्ता सुरु हुन लागेको हो ।

प्रारम्भिक दर्ता भएपछि आयोगले पालो आउने दिनसहितको विवरण मोबाइलमा पठाउनेछ । त्यसपछि नामावली दर्ता गराउने व्यक्तिले बायोमेट्रिकका लागि सम्बन्धित निर्वाचन कार्यालयमा पुग्नुपर्ने आयोगले जनाएको छ ।