विराटनगर, ११ फाल्गुन । १ नम्बर प्रदेश सरकार र प्रदेश १ पुनः नामाङकन संयुक्त संघर्ष समितिबीच दोस्रो चरणको वार्ता ३ बुँदे सहमति गर्दै सकिएको छ ।
विराटनगरको इस्टर्न स्टार होटलमा बुधबार सम्पन्न वार्तामा तेस्रो चरणको वार्तामा दुवै पक्ष निचोडमा पुग्नेगरी तयारी गरेर आउने सहमति भएको हो । फाल्गुनसम्ममै वार्तालाई निष्कर्षमा पु¥याउने दुवै पक्षले बताएका छन् ।
पहिलो चरणमा भएको वार्ताको सहमति अनुसार बुँदा नम्बर ३ र ४ लाई सरकारी पक्षले फागुन मसान्तभित्र कार्यान्वयन गर्ने सहमति भई वार्तापछि दुवै पक्षले हस्ताक्षर गरेको सहमतिपत्रमा उल्लेख छ । सो बुँदाहरुमा आन्दोलनका क्रममा पक्राउ परेका, मुद्दा लागेका आन्दोलनकारीको मुद्दा फिर्ता लिने र आन्दोलनका क्रममा घाइँते भएकाहरुको उपचार खर्च प्रदेश सरकारले ब्यहोर्ने उल्लेख छ ।
दुई दिन बसेको पहिलो दोस्रो चरणको वार्ताको दोस्रो दिन माघ २६ गते दुबै पक्षबीच भएको वार्तामा ५ बुँदे सहमति भएको थियो । सहमति कार्यान्वयनको लागि दुवै पक्षले २–२ जना सदस्य रहनेगरी कार्यदल गठन गर्ने बुधबारको वार्तापछि सहमति जुटेको हो ।
वार्तामा सरकार पक्षका वार्ता संयोजक भौतिक पूर्वाधार विकासमन्त्री कमलप्रसाद जबेगु, उद्योग, कृषि तथा सहकारी मन्त्री रामकुमार खत्री, आन्तरिक मामिला मन्त्रालयका सचिव लक्ष्मीप्रसाद पौडेल सहभागी थिए ।