दमक, २४ फागुन । १ नं. प्रदेश सरकारले पहिचान पक्षधरको आन्दोलनका क्रममा घाइते भएका पदम कुमार लिम्बू (लाजेहाङ)को परिवारलाई ५ लाख राहत दिने निर्णय गरेको । बुधबार बसेको मन्त्रिपरिषदको बैठकले आन्दोलनका क्रममा घाइते भई उपचारका क्रममा मृत्यु भएका उनका परिवारलाई रकम दिने निर्णय गरेको हो ।

त्यस्तै,सरकारले प्रदेश १ को पहिचान आन्दोलनका क्रममा घाइते भएकाहरुको छानबिनका लागि समितिसमेत गठन गर्न आन्तरिक मामिला तथा कानुन मन्त्रालयलाई जिम्मेवारी दिने निर्णय गरेको छ ।

समितिले विभिन्न चरणमा भएको पहिचान आन्दोलनका घाइतेको पहिचान गरेपछि उपचार लगायतको विषयमा प्रक्रिया अघि बढ्ने प्रदेश सरकारका प्रवक्ता आन्तरिक मामिला तथा कानुनमन्त्री शम्शेर राईले जानकारी दिए ।

गत बर्ष चैत्र ५ गतेको प्रदेश नं. १ पुनः नामाङकन संयुक्त सघर्ष समितिको आव्हानमा विराटनगरमा भएको बृहत जनप्रदर्शनको क्रममा घाइते भएका लाजेहाङको उपचारको क्रममा निधन भएको थियो ।

यसैगरी प्रदेश सरकारले मोरङको उल्लाबारीमा भएको आगलागीको क्रममा झापा र मोरङमा भएको उपचारको खर्च बेहोर्ने निर्णय भएको समेत मन्त्री राईले बताए ।