दमक, ४ चैत्र । नेपाल आदिवासी जनजाती पत्रकार महासंघका केन्द्रीय महासचिव मिलन लिम्बूले इलाम २ को प्रतिनिधिसभा सदस्य उपनिर्वाचनमा उम्मेदवारी घोषणा गरेका छन् । आइतबार काठमाडौं अनामनगरस्थित युनियन हाउसमा आयोजित पत्रकार सम्मेलनमा उनले उपनिर्वाचनमा स्वतन्त्र उम्मेदवार बन्न लागेको घोषणा गरेका हुन् ।

संविधानसभाका पूर्व अध्यक्ष सुबास नेम्वाङको निधनपछि इलाम २ को प्रतिनिधिसभा सिट रिक्त रहेको छ । निर्वाचन आयोगले इलाम २ मा १५ वैशाखमा उपनिर्वाचन गर्ने निर्णय गरेको छ ।

‘पार्टी होइन स्वतन्त्र, भ्रष्ट होइन इमान्दार !’ भन्ने नारासहित ‘सामाजिक न्याय, सुशासन, विकास र पहिचान’लाई आफ्नो अभियान बनाउँदै इलाम २ को उपनिर्वाचनमा उम्मेदवारी दिन लागेको उनले बताए ।

स्वतन्त्र लिम्बुले व्यवस्था परिवर्तन भए पनि राजनीतिक दलहरुको गैरजिम्मेवारीपनले गर्दा नागरिकको अवस्था परिवर्तन नभएको लिम्बुले बताए । उनले पत्रकार सम्मेलनमा बोल्दै भने, ‘राजनीतिक दलहरुले नेपाली नागरिकसामू गरेका बाचाहरुलाई पूरा गर्नु त कहाँ हो कहाँ उनीहरु आफैलाई सर्वोपरी ठान्दै सत्ता लिप्सामा लिन हुन पुगे ।’ राजनीतिक दलहरुको सिण्डिकेट तोड्न र जनताको मतको सम्मानका लागि इलामेली नागरिकले आफूलाई उम्मेदवारी दिन प्रेरित भएको उनको भनाइ थियो ।

दलहरुले जनमत र विश्वासलाई विकास तथा समृद्धिमा लगाउनुको साटो भ्रष्टाचारमा एकपछि अर्को काण्डमा लागेको उनको आरोप छ । लिम्बू झण्डै डेढ दशकदेखि विभिन्न राष्ट्रिय मिडिया र मोफसलको पत्रकारिता साथै आदिवासी जनजाति पत्रकार महासंघ लगायत पत्रकारजन्य संघ संस्थामा आबद्ध तथा इलामको सामाजिक सेवामा सक्रिय छन् ।