दमक, २६ जेठ । नेकपा माओवादीले दमक नगरपालिकामा १९ बुँदे माग राख्दै ज्ञापनपत्र बुझाएको छ । दमकमा १ अर्व ५६ करोड बजेटमा निर्माणधीन भ्यू टावरलाई मेडिकल कलेज सहित प्रादेशिक अस्पताल बनाई संचालन गरिनु पर्ने समेत माग पत्रमा उल्लेख गरिएको छ ।
आज दमक नगरपालिकाका नवनिर्वाचित प्रमुख राम थापालाई माओवादी दमक नगर कमिटिले ज्ञापनपत्र बुझाउँदै सो माग गरिएको हो । मागपत्रमा झापाको दमकमा मात्र उठाइदै आएको सवारी पटके कर समेत हटाउने पर्ने उल्लेख गरेको छ । सो बुँदामा जिल्ला भर कँही नभएको सवारी कर हटाउँने भनि गठबन्धनको चुनाव अघिको घोषणा तत्काल कार्यान्वयनमा ल्याउन भनिएको छ ।

यस्तै ज्ञापनपत्रमा भूमिहीन तथा सुकुम्बासीको समस्या तत्काल समाधन गर्नु पर्ने, निःशुल्क खानेपानी वितरण र सरसफाई कर हटाउनु पर्ने, दमक ९ मा निर्माण भईरहेको सामुदायिक भवनलाई निर्माण पूर्व भएको सम्झौता अनुसार फाल्गुनन्द सामुदायिक भवन नामकरण गरिनु पर्ने लगायतका माग गरिएको माओवादीका नेता तिर्थराज बस्नेत शंकरले बताए ।
ज्ञापनपत्र बुझ्दै नवनिर्वाचित नगर प्रमुख थापाले आफूहरुले निर्वाचन अघि गरेका घोषणा र विपन्न नागरिकको हितमा हुने कार्य गर्न विनियिम र ऐनमा टेकेर हुनेसम्मको कार्य गर्ने जनाएका छन् । स्थानीय तह सरकारको अधिनमा रहेर सकेसम्म काम गर्नेमा जोड दिने बताए ।
दमक नगरपालिकामा प्रमुख, उपप्रमुख र ३ वटा वडाको अध्यक्षमा गठबन्धनको तर्फबाट राप्रपा र काँग्रेसले विजय प्राप्त गरेको छ भने बाँकी ७ वटा वडाको अध्यक्ष सहितको प्यानलमा एमालले विजय प्राप्त गरेको छ । दमक नगरमा प्रतिपक्षी दल एमालेको बहुमत रहेको छ ।