दमक, २१ साउन । मोरङको पथरीशनिश्चरे नगरलाई आफ्नो कर्मक्षेत्र बनाएर विभिन्न विषयमा पुस्तकहरू प्रकाशित गर्दै आएका यूवा लेखक दिपेन्द्र तिमिल्सिनाले पूनः अर्को ९औं खोजमूलक पुस्तक सार्वजनिक गरेका छन् ।
दैनिक १० देखि १५ किलोमिटर पैदल हिडेर जिल्लाका विभिन्न पालिकाका वडा–वडा पुगेका लेखक तिम्सिनाले मोरङका १७ वटा पालिकाका १७ जना नवनिर्वाचित प्रमुख÷उप प्रमुख तथा १ सय ५९ जना वडाध्यक्षहरुलाई भेटेर जिवनी लेखेका हुन् ।
लामो समय पत्रकारिता गरेका लेखक तिमिल्सिनाले जिल्लाका ६, सय ३६ जना वडा सदस्यहरुको तथ्यांक संकलन पनि गरेका छन् । मुख्य पूर्व – पश्चिम राजमार्ग खण्डमा मात्रै सवारीसाधन प्रयोग गर्ने तर बाईक वा अन्य कुनै पनि सावारी साधनहरू नचढी बैशाख–जेठ महिनाको टन्टलापुर घाम र गर्मी सँगै बर्षाको झरीसँगै पुस्तकका विषयवस्तु संकलन गरेका अविस्मरणीय क्षणहरु जिन्दगीको यादगार भएको बताए ।
उनले पुस्तक तयारीका क्रममा कतिपय पालिकाका वडा कार्यालयहरू अहिले पनि सरकारी विद्यालय वा सामुदायिक वनमा समेत रहेको भेटाएका छन् । यसैगरी, अव्यवस्थित जग्गा प्लटिङ्ले जिल्लाका अधिकांश पालिकाहरूमा बर्खायाममा खोला किनारामा मात्र हैन; सुविधासम्पन्न बजारमै ठुलो डुवान हुने गरेको पाईएको छ ।
पुस्तक तयारीका लागि केही पालिकाका वडाध्यक्षले वडाध्यक्ष पदमा निर्वाचित भए पनि आफ्नो अधिकार र काम–कर्तव्यका बारेमा केही थाहा नभएको पनि पाएको बताए । यस अघिका मोरङका ८ जना प्रधानमन्त्रीहरुले सत्ता सम्हाली सकेको यो मोरङ जिल्लामा २०४९ र २०५४ सालमा तत्कालिन ६५ वटा गाविस अध्यक्षहरु थिए ।
पुस्तक भित्र लेखक तिमिल्सिनाले मोरङमा माओवादी जनयूद्ध तथा अन्य जनआन्दोलनमा मारिएकाहरुको विवरणहरु उल्लेख गरेका छन् । लेखक तिमिल्सिनाले पुस्तकभित्र माओवादी द्वन्द्वकालमा बेपत्ता हुनेहरु, सरकार पक्ष र माओवादी पक्षबाट मारिएकाहरुको विवरण, मोरङका प्रमुख जिल्ला अधिकारीहरु, मोरङबाट केन्द्रीय सरकारमा मन्त्री हुनेहरु, २०१५ सालदेखि २०७४ सालसम्मका प्रत्येक निर्वाचनमा निर्वाचित जनप्रतिनिधिहरु, जिल्ला बिकास समिति, जिल्ला समन्वय समितिका सभापति÷अध्यक्षहरु समेतको विवरणहरु राखेका छन् ।