दमक, ७ भदौ/  दमक उद्योग वाणिज्य संघको ३४औं स्थापना दिवसको अवसरमा आयाेजित  दोस्रो अन्तर वस्तुगत संघ फुटसल प्रतियोगिताकाे उपाधि होटल व्यवसायी संघले हात पारेकाे छ ।

प्रतियोगिताको शुक्रबार सम्पन्न फाइनल खेलमा निर्माण व्यवसायी संघको टिमलाई पराजित गर्दै होटल व्यवसायी संघले उपाधि जित्न सफल भएको हो । उसले ३३ हजार ३ सय ३३ नगद र कप पुरस्कार हात पार्यो । उपविजेता निर्माण व्यवसायीले २२ हजार २ सय २२ रुपैयाँ नगद सहितको पुरस्कार प्राप्त गर्यो ।

विजेता टिमका सुजन राईलाई उत्कृष्ठ खेलाडी घोषित गरी नगद ५ हजार १ सय रुपैयाँ नगद पुरस्कार प्रदान गरियो । अनुशासित टिमको उपाधि कस्मेटिक तथा व्याग व्यवसायी संघले प्राप्त गर्यो । उसलाई ३ हजार ३ सय ३३ रुपैयाँ प्रदान गरिएको छ ।

प्रतियोगितामा वस्तुगत १२ र आयोजकको एउटा सहित दमकका १३ टिमको सहभागिता रहेको थियो