काठमाडौं, ५ मंसिर । निर्वाचन आयोगका अनुसार आइतबार सम्पन्न प्रतिनिधिसभा र प्रदेशसभा निर्वाचनमा ६१ प्रतिशत मतदान भएको छ । आयोगका प्रमुख निर्वाचन आयुक्त दिनेश थपलियाले आयोगको प्रणालीमा प्रविष्ट भएको विवरण बताएका हुन् ।

सबै विवरण प्रविष्ट हुँदा केही प्रतिशत थप हुन सक्ने आशा गरेको उनले बताए । आयोगले अनुमान गरेको भन्दा थोरै मात्र मतदान भएको प्रमुख आयुक्त थपलियाले जानकारी दिए । आयोगले निर्वाचन सम्पन्न गर्न खटिएका सबै क्षेत्र र समुदायलाई आभार प्रकट गरेको छ ।

सुर्खेत, नवलपरासी पूर्व, गुल्मी र बाजुरा जिल्लाका १५ स्थानमा भने मतदान स्थगित भएको आयोगले नियमित पत्रकार सम्मेलनमा जनाएको छ । यसैक्रममा बाजुरामा खटिएका एक कर्मचारीको मृत्यु भएको पनि आयोगका प्रमुख आयुक्तले बताए ।

हिमाली जिल्ला बाहेकका सबै मतपेटिकाहरु निर्वाचन अधिकृत कार्यालयमा ढुवानी भएको तथा हिमाली जिल्लाका मतपेटिकाहरु सोमबार अपान्हसम्ममा नेपाली सेनाको हेलिकप्टरबाट मुख्य निर्वाचन कार्यालयसम्म ढुवानी गर्ने आयोगले जनाएको छ ।