दमक, १९ जेठ । झापामा मोटरसाइकल चोरीमा संलग्न ८ जनाको एक गिरोहलाई प्रहरीले पक्राउ गरी आज सार्वजनिक गरेको छ । पक्राउ पर्नेहरुमा दुई जना नाबालकसमेत रहेका छन् ।
इलाका प्रहरी कार्यालय विर्तामोडमा पत्रकार सम्मेलन मार्फत उनीहरुलाई सार्वजनिक गरिएको हो । मोटरसाइकल चोरीमा संलग्न बिर्तामोड–५ बस्ने १८ वर्षिय करण मण्डल, वडा न. ३ बस्ने १९ वर्षिय कुमार राजवंशी, अर्जुनधारा– ८ बस्ने १८ वर्षिय समिर मियाँ, आहिल ग्यारेजका संचालक सप्तरी, टिकुली –५ बस्ने १७ वर्षिय करण महमद, गौरीगञ्ज– ५ बस्ने १८ वर्षिय ओमप्रकाश यादव, इलाम, चुलाचुली बस्ने १८ वर्षिय राहुल श्रेष्ठ तथा १४ र १५ वर्षका दुईजना नाबालक रहेका छन् ।
बिर्तामोड क्षेत्रमा विगत केही महिनादेखि विभिन्न मिति र समयमा मोटरसाइकल चोरीको घटना बढ्दै गएपछि जिल्ला प्रहरी कार्यालय झापा र इलाका प्रहरी कार्यालय बिर्तामोडको संयुक्त टोलीले सुक्ष्म रुपमा खोजतलास शुरु गरेको थियो ।
त्यसक्रममा जेठ १८ गते अर्जुनधारा–८ कदमगाछीस्थित अशोक विहारीको घर र अर्जुनधारा –१० स्थित बिमल हुमागाईको घर सटरमा ग्यारेज संचालन गर्ने सप्तरी, टिकुली –५ घर भएका करण महमदको मोटरसाइकल ग्यारेजबाट ६ वटा मोटरसाइकल बरामद भएको थियो ।
त्यस्तै झापाका विभिन्न स्थानबाट ५ र इलामबाट एउटा गरी थप ६ वटासमेत गरी जम्मा १२ वटा चोरीको मोटरसाइकलसमेत बरामद भएको जिल्ला प्रहरी कार्यालयका प्रवक्ता डिएसपी बसन्त पाठकले बताए ।
बरामद गरिएका मोटरसाइकलहरुमा प्र.१–०१–०१४प ९३१९, मे ६ प ७६३९, प्र.१–०१–०१२ प २७५, नम्बर प्लेट नटाँसेको एउटा, मे ७ प ७६४३, मे १ प ७९४, मे ६ प ६४५१, मे ११ प ५२३७, मे प ७६३९, मे ९ प ७३४६, मे ५ प ७१५०, मे४ प ४०६२ रहेका छन् ।
कार्यक्रममा बोल्दै डिएसपी पाठकले मोटरसाइकल चोरीमा संलग्न अरु पनि समूह हुनसक्ने भन्दै खोजीका लागि प्रहरीले सक्रियता बढाएको बताए । दुईदिन अघिमात्र दमक प्रहरीले चोरी गरेको चारवटा मोटरसाइकलसहित दुईजनालाई पक्राउ गरी सार्वजनिक गरेको थियो ।