तेह्रथुम/ आफ्नै बाबुलाई फलामको मुस्लीले हिर्काएर हत्या गर्ने तेह्रथुमका एक युवक पक्राउ परेका छन । हत्यापछि फरार रहेका २४ बर्षीय टंक बहादुर भण्डारी मंगलबार राती पक्राउ परेका हुन् ।

उनले सोही दिन बिहान बाबु ५३ बर्षीय भक्त बहादुर भण्डारीलाई घरायसी बिवाद हुदाँ धान कुट्ने फलामको मुस्लीले टाउकोमा प्रहार गरि घाईते बनाएर फरार भएका थिए । घाईते भक्त बहादुरको छथर अस्पताल शुक्रवारेमा उपचारको क्रममा बिहान सवा ७ बजे मृत्यु भएको थियो ।

घटनापछि फरार रहेका टंक बहादुरलाई प्रहरीले राती साढे ९ बजे तेह्रथुमको म्याङलुङ नगरपालिका पिङ्गुवा खोलाको पुल आसपास एरियाबाट पक्राउ गर्न सफल भएको हो । उनीमाथी मुलुकी अपराध संहिता, २०७४ अनुसार ज्यान सम्बन्धी कसुरमा तेह्रथुम जिल्ला अदालतबाट म्याद थपको आदेश लिएर थप अनुसन्धान अघि बढाइएको जिल्ला प्रहरी कार्यालय तेह्रथुमले जनाएको छ ।