श्रीकृष्ण प्रकाट्य भएको खुशीयालीमा दमकमा शनिबार अपरान्ह बृहत रथयात्रा निकालिएको छ । श्रीकृष्ण रथयात्रा समितिको मुख्य आयोजनामा दमकका दर्जन बढी सामाजिक तथा धार्मिक एवं जातजाती सम्बद्ध समुहको सक्रिय सहभागितामा निकालिएको रथयात्रामा करिब एक हजार बढी मानिसहरु सहभागी भएका अनुमान गरिएको छ ।

रथयात्रामा सहभागीहरुलाई दमकको भृकुटी चोकमा भेला भएका स्थानीय जाल्पादेवी किर्तनमण्डली परिवारले भव्य स्वागत गर्दै श्रीकृष्णको आरतीमा सहभागिता जनाएको थियो । सर्वसाधारणले पुष्पबृष्टी गराएर रथयात्रालाई स्वागत गरेका छन ।

भगवान श्रीकृष्णले महाभारत लडाइँमा रथकै प्रयोग गरेर विजयी हासिल गरेकाले कृष्णको स्मरण गराउन रथयात्रा निकाल्ने गरिन्छ । सर्वसाधारणहरु ठुलो संख्यामा आफनो नियमित कामकाज छोडेर यो यात्रामा सहभागी हुने गर्छन । रथको डोरी छोयो भने मोक्ष प्राप्त हुने र मनोकामना पूरा हुने विश्वास रहँदै आएको छ ।