दमक, २८ चैत्र । आगामी बैशाक १५ गते इलाम निर्वाचन क्षेत्र नं. २ मा हुने उपनिर्वाचनका लागि पहिचान पक्षधरका साझा स्वतन्त्र उम्मेदवार डकेन्द्र सिंह थेगिमले चुनाब चिन्ह हातले बुनेको ‘मुढा’ पाएका छन ।
मंगलबार निर्वाचन आयोगको कार्यतालिका अनुसार उम्मेदवारको अन्तिम नामावली प्रकाशन र चुनाव चिन्ह वितरण गरिएको उपनिर्वाचन मुख्य कार्यालय इलामका प्रमुख केशवप्रसाद घिमिरेले बताए ।
कार्यतालिका अनुसार चैत २८ देखि वैशाख १२ सम्म प्रचारप्रसारका लागि समय तोकिएको छ भने वैशाख १५ बिहान सातदेखि साँझ पाँच बजेसम्म मतदानको लागि समय तोकिएको छ ।
स्वतन्त्र उम्मेदवार डकेन्द्र सिंह थेगिमले चुनाब चिन्ह हातले बुनेको ‘मुढा’
प्रदेश १ पुनः नामाङकरण संयुक्त संघर्ष समितिका ४१ वटा घटकहरुको समर्थनमा चुनावी मैदानमा उत्रेका स्वतन्त्र उम्मेदवार डकेन्द्र सिंह थेगिमलाई अन्य राजनैतिक दलहरुले समति समर्थन गरेका छन् ।
थेगिमलाई जनता समाजवादी पार्टी, नागरिक उन्मुक्ति पार्टी, नेपाल समाजवादी पार्टी, राष्ट्रिय जनमुक्ति पार्टी, संघीय लोकतान्त्रिक राष्ट्रिय मञ्च, बहुजन शक्ति पार्टी, संयुक्त नागरिक पार्टी लगायत पार्टीहरुले समर्थन गरेका छन् । त्यसैगरी धरान उपमहानगरका मेयर हर्क साङ्पाङ् र काठमाडौंका मेयर बालेन शाह लगायत स्वतन्त्रबाट विजयी मेयरहरुले समेत स्वतन्त्र उम्मेदवार थेगिमलाई समर्थन गरेका छन् ।
उपनिर्वाचनका लागि २० उम्मेदवारले मनोनयन दर्ता गराएका छन् । बाह्र दल र आठ स्वतन्त्र उम्मेदवारले उम्मेदवारी मनोनयन दर्ता गराएको आयोगले जनाएको छ ।
नेकपा एमाले उपाध्यक्ष सुवासचन्द्र नेम्वाङको गत भदौ २६ मा निधन भएपछि रिक्त भएको उक्त क्षेत्रमा उपनिर्वाचन हुन लागेको हो ।