दमक, १४ साउन । झापाको दमक नगरपालिकाले वरिष्ठ लोक गायक लक्ष्मीप्रसाद जोशी (एलपी) जोशीको निधनमा आज आधा दिन स्थानीय शोक विदाँ दिएको छ ।

नगरपालिकाका प्रमुख प्रशासकीय अधिकृत गणेशराज कार्कीले आज सूचना निकालेर स्व. जोशीको निधनमा श्रद्धाञ्जली अपर्ण गर्दै आज दिउँसो १ बजे पश्चात दमक नगरपालिका नगर कार्यपालिकाको कार्यालय र मातहतका वडा कार्यालयहरु, शैक्षिक संस्थाहरुमा (दमक अस्पताल बाहेक) शोक बिदा दिईएको जनाएका छन् ।

शोक विज्ञप्तिमा स्व. जोशीले गीतसंगीत,साहित्य ,खेलकुद तथा कलाकर्मीका रुपमा दमक मात्र नभएर सिंगो क्षेत्रमा पुरयाँएको योगदान स्मरणीय रहने उल्लेख छ ।

दमक १ निवासी स्व. जोशीको ८८ वर्षको उमेरमा १० साउनमा निधन भएको थियो । उनको पार्थिव शरीरको आज दिउँसो जिल्लाको कन्काई नदीमा अन्त्येष्टि गरिने पारिवारिक स्रोतले जनाएको छ । विशेषगरि निकै चर्चामा रहेको लोकगीत ‘रिटिङ रिटिङ नबजाऊ विनायो, ‘ओल्लो खोलो पल्लो खोलो कमिलाको गोलो’ भनेर हौ रानाज्यु लगायतका गीतहरुले उनलाई चिनाएको थियो। राष्ट्रिय अन्तर्राष्ट्रिय पुरस्कार र सम्मानहरुबाट सम्मानित स्रष्टा दमकका गौरव एवम् नेपाली लोकगीत संगीत क्षेत्रका एक हस्ती मानिन्थे ।

स्व. जोशीका श्रीमती विन्दा ,छोरा पूजनको निधन भईसकेको छ भने हाल छोरा मिलनसहित बुहारी,नातिनातिनीहरुसंग बस्दैआएका थिए । उनको पार्थिव शरीरलाई अन्तिम श्रद्धाञ्जलीका लागि दमक नगरपालिका परिषरमा राखिएको छ ।

श्रद्धाञ्जली दिन नगर प्रमुख रामकुमार थापा, उपप्रमुख रेगिना भट्टराई लगायतका जनप्रतिनिधिहरु, विभिन्न राजनीतिक दल,सामाजिक संघसंस्था, कलाकर्मीहरु, साहित्यअनुरागी तथा सर्वसाधारणहरुको उल्लेखीय उपस्थिति रहेको थियो ।