दमक। दमक उद्योग वाणिज्य संघले दमक नगरपालिकालाई ध्यानाकर्षण पत्र बुझाएको छ । नपाले घर बहाल कर समेत व्यवसायीहरुबाट असुल गरिरहेको हुँदा उद्योगी व्यवसायीहरुले सम्बन्धित निकायको ध्यानाकर्षण गराएका हुन् ।

व्यवसायीहरुले नगरपालिकाबाट व्यवसाय दर्ता तथा नविकरणका सिलसिलामा घर धनीसंग असुल गर्नुपर्ने बहाल कर समेत आफूहरुले तिर्नु परिरहेको गुनासोसहित दमक उद्योग वाणिज्य संघले सोको विरोध गरेको हो ।

आज मंगलबार संघका अध्यक्ष गोकुल श्रेष्ठको नेतृत्वमा नगरपालिका कार्यालय पुगेको संघका पदाधिकारीहरु संलग्न टोलीले नगर प्रमुख रोमनाथ ओलीलाई ध्यानाकर्षण सहित ज्ञापन पत्र बुझाएको छ ।

ज्ञापन पत्रमा कोरोना संक्रमणका कारण व्यवसायीहरु मारमा परिरहेको बेला अनावश्यक करको भार समेत थोपरिँदा निजीक्षेत्रमाथि अन्याय भएको उल्लेख गरिएको छ । संघले नगरपालिकाबाट भइरहेको त्यस्तो कार्य तत्काल बन्द गरेर करको भार घटाउन र व्यवसायीहरुलाई सहुलियत प्रदान गर्न समेत ध्यानाकर्षण गराएको छ ।

संघका अध्यक्ष श्रेष्ठ, वरिष्ठ उपाध्यक्ष गोपाल गुरागाइँ, प्रथम उपाध्यक्ष राजु खडका, द्धितीय उपाध्यक्ष राजकुमार योङया, तृतीय उपाध्यक्ष रमा लिम्बुसहित व्यवसायी नेताहरुको समुह स्थानीय सरकारको ध्यानाकर्षण गराउँदै ज्ञापन पत्र बुझाउन नगरपालिका कार्यलय पुगेको थियो ।