लिम्बुवानखबर संवाददाता । चिकित्सकको गलत उपचारका कारण आफनो नाबालक शिशुको मृत्यु भएको भन्दै मंगलबार साँझ दमकस्थित एड्भान्स मल्टिस्पेशियालिटी हस्पिटलमा तोडफोड भएको छ ।

एक साता अघि बिरामी भएर उपचारका लागि ल्याइएका इलाम चुलाचुलीका डेढ महिनाका एक शिशुको उपचारमा अस्पतालको त्रुटीका कारण आज धरानमा मृत्यु भएपछि आक्रोशित समूहले अस्पतालमा तोडफोड गरेको हो ।

तोडफोडका कारण अस्पतालको महत्वपूर्ण भागहरुमा क्षति पुगेको प्रहरीले जनाएको छ । शिशुका आफन्तहरुले दोषी चिकित्सकलाई कारवाही गर्न माग राख्दै प्रर्दशनमा उत्रिएपछि अस्पताल तनावग्रस्त बन्न पुगेको थियो ।

सो घटनापछि अवस्थालाई सामान्य बनाउने प्रयास स्वरुप इलाका प्रहरी कार्यालय दमकमा अहिले पीडित पक्ष र अस्पताल प्रशासनका प्रतिनिधिहरुबीच संवाद थालिएको इलाका प्रहरी कार्यालयका प्रमुख प्रहरी नायव उपरीक्षक नवराज कार्कीले बताए ।