दमक, १५ फाल्गुन । आदिवासी संगठनका प्रशिक्षकलाई सुनसरीको इटहरीमा आयोजित तीन दिने प्रशिक्षक प्रशिक्षण बुधबार सकिएको छ । नेपालका पूर्व पहाडी भेगका वन, भूमि र जैविक विविधताको दिगो व्यवस्थापनका लागि क्षमता अभिवृद्धि आयोजना (एफएलबिइएच) अन्तर्गत आयोजना सञ्चालित जिल्लामा प्रशिक्षक उत्पादन गर्ने उदेश्यले प्रशिक्षण आयोजना गरिएको थियो ।

प्रशिक्षणमा आयोजना सञ्चालित पाँच जिल्ला इलाम, पाँचथर, ताप्लेजुङ, तेह्रथुम र संखुवासभाका दुई/दुई जना गरी १० जनाको सहभागिता थियो । प्रशिक्षणमा आयोजना व्यवस्थापन इकाई विराटनगरका आयोजना संयोजक प्रशान्त नेपाल, १ नं. प्रदेश वन निर्देशनालयका वन अधिकृत डम्बरबहादुर भण्डारी, नेपाल आदिवासी जानजाति महासंघका केन्द्रीय कोषाध्यक्ष विमल सारु मगर र सहजकर्ता हरी थलङले प्रशिक्षण दिएका थिए ।

प्रशिक्षणमा आदिवासी जनजाति महासंघ, एफएलबि आयोजना   वयस्क सिकाईका सिद्धान्त, प्रशिक्षकका टिप्सहरु, तालिका प्रविधि, प्रभावकारी तालिम डिजाइन, स्वतन्त्र, अग्रिम र सुसूचित मञ्जुरी (एफपिक), अन्तर्राष्ट्रिय श्रम संगठन महासन्धि १६९, राष्ट्रिय र अन्तर्राष्ट्रिय कानुनमा एफपिकको प्रावधान, एफपिक कार्यान्वयन प्रक्रियालगायतका विषयमा छलफल भएको थियो ।

नेपालको पूर्वी पहाडी क्षेत्रमा संरक्षित क्षेत्र भन्दा बाहिर विश्वव्यापी रूपमा महत्वपूर्ण जैविक विविधता संरक्षण र दिगो जीविकोपार्जनका लागि सुधारिएको पारिस्थितिक प्रणाली सेवाहरूको प्रवाह गर्ने उदेश्यले गतवर्षदेखि आयोजना सञ्चालित छ । विश्व वातावारण सुविधा (जीऐएफ) को आर्थिक सहयोगमा युक्त राष्ट्र संघ, खाद्य तथा कृषि संगठन (एफएओ) को प्राविधिक सहायतामा वन तथा वातावरण मन्त्रालयको आयोजना र नेपाल आदिवासी जनजाति महासंघको व्यवस्थापनमा पर्यटन, वन तथा वातावरण मन्त्रालय, १ नं. प्रदेशले आयोजना कार्यान्वयन गरिरहेको छ ।