एजेन्सी । १२९ बर्षको इतिहासमा अन्तिम मिनेटमा गोलकिपर एलिसोन बेकरले गोल गरेपछि इङ्लिस प्रिमियर लिगमा लिभरपुलले रोमाञ्चक जित हात पारेको छ । इन्जुरी समयको पाँचौँ अर्थात ९५ औँ मिनेटमा गोलरक्षक एलिसनले हेड मार्फत सुन्दर गोल गरि लिभरपुलको जित पक्का गरेका हुन् । लिभरपुलका लागि सन् १८९२ पछि १२९ बर्ष पछि गोलकिपरले निर्णायक गोल गरेका हुन् ।

घरेलु टोली वेष्ट ब्रोमसँगको सो खेलमा १५ औँ मिनेटमा रोब्सन कानुले गोल गरि घरेलु टोलीलाई सुरुवाति अग्रता दिलाएका थिए । मोहम्मद सालहले लिभरपुलका लागि ३३ औँ मिनेटमा बराबरी गोल गरे ।

लिभरपुलको १२९ वर्षको इतिहासमा कुनै पनि गोलरक्षकले महत्वपूर्ण प्रतिस्पर्धात्मक खेलमा गोल गरेका थिएनन् । एलिसन प्रिमियर लिगमा गोल गर्ने छैटौँ गोलरक्षक बनेका छन् । र हेड मार्फत गोल गर्ने पहिलो हुन् ।

खेल लगत्तैको अन्तर्वार्तामा एलिसनले आफ्ना पितालाई सम्झिँदै भने, ‘आश छ कि उहाँ यहिँ हुनुहुन्थ्यो मेरो खेल हेर्नका लागि, उहाँले यो क्षण भगवानको साथमा सेलिब्रेट गरिरहनु भएको छ भन्ने विश्वासमा छु ।’ एलिसनका ५७ वर्षे पिताको गएको फेब्रुअरीमा ब्राजिलमा आफ्नो बिदा मनाउने घर नजिकैको बाँधमा डुबेर निधन भएको थियो ।

जितसँगै लिभरपुलको शीर्ष चारमा रहेर च्याम्पियन्स लिगमा छनोट हुने सम्भावना जीवितै बनेको छ । पाँचौ स्थानको लिभरपुलको अन्तिम दुई खेलअघि ६३ अंक छ । चौथो स्थानको चेल्सीको ६४ अंक छ भने तेस्रो स्थानको लेस्टर सिटीको ६६ अंक छ । यी दुई टिमबीच आगामी लिग खेलमा प्रतिस्पर्धा हुनेछ। जसको फाइदा लिभरपुललाई हुँदैछ ।

साेसल मिडियामा भाइरल भएकाे भिडियाे तल हेर्नुहाेस्ः