फाइल तस्वीरः

काठमाडौं। नवनियुक्त प्रधानमन्त्री शेरबहादुर देउवाले विश्वासको मत लिने भएका छन् । सर्वोच्च अदालतले दोस्रो पटक विघटित प्रतिनिधिसभालाई पुनःस्थापना गरेपछि आज(आइतबार) बस्ने पहिलो बैठकबाटै विश्वासको मत लिने तयारी भएको हो ।

पुनःस्थापित प्रतिनिधिसभा बैठक आज अपरान्ह ४ बजे बस्दैछ । संसद सचिवालय स्रोतका अनुसार आजको बैठक दुई चरणमा बस्नेछ । पहिलो चरणमा कार्यसूची सम्पन्न गरिने छ भने त्यसपछिको दोस्रो चरणमा प्रधानमन्त्री देउवाले विश्वासको मत लिने गरी तयारी गरिएको सचिवालय स्रोतले बताएको छ ।

प्रधानमन्त्री देउवा सर्वोच्चको परमादेशपछि गत असार २९ गते प्रधानमन्त्रीमा नियुक्त भएका हुन् । प्रधानमन्त्रीमा नियुक्त भएको ३० दिन भित्र संविधानअनुसार विश्वासको मत लिनुपर्ने संवैधानिक व्यवस्था रहेको छ ।

बालुवाटार स्रोतका अनुसार विश्वासको मत लिने प्रस्ताव कानुनमन्त्री ज्ञानेन्द्रबहादुर कार्कीले कार्यव्यवस्था समितिको बैठकमा आजै लिएर जाँदैछन् । सो कार्यव्यवस्थाको बैठकले प्रस्तावलाई बैठकमा टेबुल गर्ने निर्णय गरे आज नै प्रधानमन्त्री देउवाले विश्वासको मत लिनेछन् । केही बेरमा नै कार्यव्यवस्था समितिको बैठक बस्दैछ । आजै विश्वासको मत लिने सम्भावना बढेर गएको संसद स्रोतको दावी रहेको छ ।