दमक, ३१ असार । झापा दमक नगरपालिका वडा नं. ९ का एक बालक मृत फेला परेका छन् । पौडी खेल्न गएका ११ बर्षीया स्थानीय रमन धिमाल मृत फेला परेका हु्न् ।

सुमन धिमाल र शुष्मा धिमालका कान्छा छोरा रमन सोमबार पौडी खेल्न गएका थिए । उनी घर नफर्केपछि परिवारले रातभर खोजी गरेका थिए । आज बिहान स्थानीय अर्नाखाडीमा रमनको शव फेला परेको इलाका प्रहरी कार्यालय दमकले जनाएको छ ।

इप्रका दमकका अनुसार बालकको शव दमक–४ र ९ को सीमानामा पर्ने सानो अर्नाखाडी, बेतीनि र भुतुरे खोलाको दोभानमा बिहान ५ः३० बजे फेला परेको हो ।

बालक हराएको सूचना पाएपछि राति नै खोजी कार्य अघि बढाइएको थियो । शव भेटिएपछि आवश्यक कानुनी प्रक्रिया पुरा गरी पोष्टमार्टमका लागि दमक अस्पताल लगिएको प्रहरीले जनाएको छ । घटनाबारे थप अनुसन्धान भइरहेको इप्रका दमकले उल्लेख गरेको छ ।

स्थानीयवासीले घटना प्रति गहिरो दुःख व्यक्त गरेका छन् भने रमनको परिवारमा शोकको वातावरण छ। गर्मीयाममा खुला खोलानाला र खाडीहरुमा बालबालिकाको सुरक्षाको विषयमा सचेतना आवश्यक रहेको भन्दै स्थानियहरुले सम्बन्धित निकायको ध्यानाकर्षण गराएका छन्।