दमक, १३ साउन । शहरी बिकास मन्त्री एवं नेकपा एकीकृत समाजवादीका पोलिटब्युरो सदस्य मेटमणी चौधरीले पाँच दलीय गठबन्धन आगामी निर्वाचन सम्ममा ६ दलीय गठबन्धनका रुपमा बिकास हुने बताएका छन । लोकतान्त्रिक समाजवादी पार्टी समेत यो गठबन्धनमा आवद्ध भएर निर्वाचनमा जाने उनको भनाई छ ।
झापाको दमक र आसपासकमलका महत्वपूर्ण योजनाहरुको स्थलगत निरिक्षणपछि समाजवादी प्रेस संगठन झापाले आज दमकमा आयोजना गरेको पत्रकार भेटघाटमा मन्त्री चौधरीले यो गठबन्धन यो निर्वाचनमा मात्रै नभएर अरु १०/ १५ बर्ष सम्म पनि जान सक्ने दाबी गरे ।
संघ र प्रदेशको आगामी निर्वाचन मसिंर वा फागुनमा हुन सक्ने पनि मन्त्री चौधरीले संकेत गरे ।
नेकपा माओवादी केन्द्र र नेकपा एकीकृत समाजवादीबीच चलेको एकीकरण सम्बन्धिको चर्चाले दलीय गठबन्धनमा नकारात्मक असर नपार्ने उनको स्पोष्टोक्ति छ । संसदीय व्यवस्थालाई कायम राख्न पनि केपी ओली नेतृत्वको एमाले इतरमा रहेका अन्य दलहरु एक ठाउँमा उभिनु पर्नेे अवस्था आएको उल्लेख गरे ।
उनले नेकपा एमाले पनि तत्कालिन अवस्थामा अन्य ८/९ दलसंगको सहकार्यबाट मात्रै ठुलो दलका रुपमा स्थापित भएको स्मरण गर्दै मन्त्री चौधरीले एमाले अध्यक्ष ओलीले कार्यकर्ता र आफना सांसदहरुलाई समेत ढाँटेर एक्लै ठुलो पार्टी बनेको नेर भ्रम छरेको टिप्पणी गरे । उनले अब ओलीलाई सबैभन्दा धेरै ढाँटने व्यक्तिको रुपमा नयाँ उपाधि दिनु पर्ने भनि ब्यंग्य पनि गरे ।
मन्त्री चौधरीले दमकमा निर्माणाधिन दमक भ्यू टावरलाई यहाँको मनोविज्ञान र यहाँका नागरिकहरुको आवाजलाई समेत सम्बोधन गर्दै विजनेश कम्प्लेक्सको रुपमा स्थापित गर्ने प्रकृया अघि बढाउन पनि सम्बन्धित निकायलाई निर्देशन गरिने बताए ।
मन्त्री चौधरीले आजै सो योजनासंगै दमकमा फाल्गुनन्द सभा गृहका रुपमा शिलान्यास भई परिवर्तन गरिएको दमक सभा गृह, दमक १० स्थित इन्द्रेणी ताल र कमल गाउँपालिका वडा नं ५ मा नामाकंन सम्बन्धि विवादका कारण लामो समयदेखि बन्न नसकेको आदिवासी रंगशाला तथा स्मृति पार्क निर्माणस्थलको समेत स्थलगत निरिक्षण गरेका थिए । उनले ति संगै यहाँ बजेट नपरेका दर्जन बढी योजनाहरुमा बजेटको बन्दोबस्ती गरेर कुनै न कुनै रुपमा ति योजनाहरुको निरन्तरताका लागि आफूले काम गर्ने प्रतिबद्धता जनाए ।