दमक, ११ असार । दमक निवासी लोकप्रिय लोक गायक लक्ष्मीप्रसाद (एलपी) जोशीको निधन भएको छ । बिहीबार ८८ वर्षीया गायक तथा गीतकार जोशीको झापाको विर्तामोडमा निधन भएको हो ।

वि.सं. १९९३ सालमा धनकुटा बजारमा जन्मिएका जोशी बिहीबार साँझ खाना खाएपछि अचानक बेहोस भएका थिए । उनको झापाको दमकस्थित घरबाट विर्तामोड अस्पताल लानेक्रममा बाटोमै निधन भएको उनको पारिवारिक स्रोतले जानकारी दिएको छ । उनी लामो समयदेखि मधुमेहको औषधि खाँदै आएका थिए । उनको स्वास्थ्य अवस्था कमजोर हुँदै गईरहेको थियो ।

उनले २०१३ सालमा रेडियो नेपालमा पहिलो गीत रेकर्ड गराएका थिए । २०२२ देखि २०२९ सालसम्म रेडियो नेपालमा जोशीले जनकवि केशरी धर्मराज थापासँग काम गरेका थिए ।

६६ वर्ष अघि रेकर्ड भएको ‘रिटिङ रिटिङ नबजाउ बिनायो, बिनायोले मन मेरो छिनायो’ बोलको उनको गीत सबैभन्दा चर्चित गीत हो । त्यसैगरी उनको अर्को गीत ‘वल्लो खोलो हो पल्लो खोलो कमिलाको गोलो‘ बोलको गीत समेत सबै नेपालीको मुखमा ताजै रहेको छ ।

यहि साउन ६ गते गुरु पूर्निमाको दिन सुरभि कलाकेन्द्र दमकले उहाँलाई पछिल्लोपटक सम्मान गरेको थियो । गायनका साथै चित्रकला, नृत्यकला, नाटक र केही चलचित्र समेतमा योगदान दिनुभएका उहाँको गीत कविताको एउटा पुस्तक समेत प्रकाशित छ ।
पारिवारिक स्रोतका अनुसार उनको अन्तिम संस्कार आज झापाको कन्काई माइमा हुने बताईएको छ ।