विराटनगर, १६ साउन । लिम्बुवान आन्दोलनका पूर्व एलभी कमाण्डर फक्ताङलुङ योङहाङको स्वास्थ्यस्थित बुझ्न प्रदेश नं. १ का सामाजिक विकास राज्यमन्त्री विष्णुमाया तुम्बाहाम्फे न्यूरो अस्पताल विराटनगर पुगेकि छन् ।

घरमा घाँस काट्ने मेसिनले घाँस काट्ने क्रममा हातका औलाहरु काटिएपछि हाल न्यूरो अस्पताल विराटनगरमा उपचार गराईरहेका योङ्हाङकाे स्वास्थ्य अवस्था बुझ्न आइतबार मन्त्री तुम्बाहाम्फे अस्पताल पुगेकि हुन् ।

२०६२/०६३ को जनआन्दोलनसँगै उठेको लिम्बुवान आन्दोलनका एक योद्धा नौं जिल्लाको कुनाकुनामा संगठन विस्तारको लागि खाटिएका युवा योङहाङको लिम्बुवान आन्दोलनमा अझै पनि चर्चा हुने गर्दछ । सरल र मिजासिला व्यक्तित्व भएका योङ्हाङ् कमाण्डमा भने निक्कै नै निपूण भएको लिम्बुवान भोलेन्टियर्सका कमाण्डरहरु भन्ने गर्दछन् । उनको कमाण्डमा ठूलाठूला आन्दोलनहरु सफलतापूर्वक अवतरण गरेको पूर्व एल.भी. कमाण्डर राजु राई बताउँछन् ।

हाल भने लिम्बुवान आन्दोलन बाहिर रहेका योङहाङ् कृषि तथा पशुपालन फर्म संचालन गरेर बसेका छन् । गत दुई महिना अघि मेसिनले हात काटेपछि अहिले निरन्तर उपचारका रहेका योङहाङको स्वास्थ्यमा क्रमिक सुधार भईरहेको पारिवारिक स्रोतले जनाएको राज्यमन्त्रीका स्वकिय सचिव दिपक योङहाङ् लिम्बुवानखबरलाई जानकारी दिएका छन् ।