दमक, २५ साउन । विश्व आदिवासी दिवसको अवसरमा प्रदेश सरकारले सार्वजनिक बिदा दिने निर्णय गरेको छ । १ नं. प्रदेश सरकारको मन्त्रीपरिषदको बिहिबार बसेको बैठकले सो निर्णय गरेको हो ।३०औं विश्व आदिवासी दिवस प्रदेश भर उत्सवका रुपमा मनाउन प्रदेश भित्रका सबै सरकारी कार्यालय, स्थानीय तह, सार्वजनिक संस्थान, प्रतिष्ठान र शैक्षिक संस्थाहरुमा सार्वजनिक बिदा दिइएको हो ।

मुख्यमन्त्रीको कार्यालयले बिहिबार अपरान्ह सो ब्यहोराको सूचना सार्वजनिक गरेको छ । तेह्रथुम, झापा, मोरङ लगायत जिल्लाका कतिपय स्थानीय तह अर्थात स्थानीय सरकारहरुले पनि त्यसअघि सार्वजनिक सूचना निकालेर आ–आफनो स्थानीय तहमा स्थानीय बिदा दिइएको सार्वजनिक गरेका थिए ।

सार्वजनिक बिदा प्रदेश सरकारले दिए पनि आज (शुक्रबार) हुने एसइइको ग्रेड बृद्धि परीक्षा भने नरोकिने जनाइएको छ । एसइई परीक्षाको सञ्चालन राष्ट्रिय परीक्षा बोर्डले सञ्चालन गर्दै आएको छ ।

यसैगरी आदिवासी जनजाति महासंघ लगायतअन्य विभिन्न जातीय संघ संगठनले विविध कार्यक्रमहरु गरी आज विश्व आदिवासी  दिवस मनाउँदैछन् ।

त्यस्तै प्रदेशको नाम कोशी नामाकरणमा हस्ताक्षर गर्ने ८२ सभासदस्य र एमालेका ३ नेताहरुलाई भने सबै कार्यक्रममा बहिष्कार गर्न प्रदेश नं. १ पुनः नामाङकन संयुक्त संघर्ष समिति, पहिचानवादी संगठनहरू, विभिन्न जातीय संघ संस्थाका प्रमुखहरूले अनुरोध गरेको छन् ।