दमक, २८ साउन । ताप्लेजुङको सुकेटारस्थित विमानस्थलबाट बुधबारदेखि हवाई सेवा सञ्चालन हुने भएको छ । ताप्लेजुङको सुकेटार विमानस्थलमा गत जेठ ११ गतेदेखि उडान बन्द भएको थियो ।

मौसम राम्रो भएमा बुधबारदेखि उडान सुरु गरिने नेपाल वायुसेवा निगमले जनाएको छ । जेठ ११ गते अन्तिम उडान गरेको निगमले त्यसपछि सातामा एक दिन तालिका राखे पनि उडान भने गरेको छैन । यसअघि सोमबार, बुधबार र शनिबार गरी साताको तीन उडान गर्दै आएको थियो ।

मौसममा सुधार आएसँगै उडान गर्न सकिने तालिका राखिएको निगमले बताएको छ । पर्यटकीय जिल्ला भए पनि हवाई यातायात भरपर्दो नहुँदा पर्यटकीय गतिविधिमा शिथिलता आएको ताप्लेजुङ्का पर्यटक व्यवसायीहरू बताउँछन् ।

सुकेटर विमानस्थलमा छिनछिनमा मौसम परिवर्तन भइरहेको कारण जेठ, असार, साउन र भदौ महिनामा हवाई सेवा ठप्प हुने गरेको छ । गत वर्ष पनि असारदेखि स्थगित भएको उडान भदौदेखि सुरु गरेको थियो ।