काठमाडौं । प्रधानमन्त्री केपी शर्मा ओलीले हिन्दुहरूकाे महान चाड बडादशैंका अवसरमा शुभकामना दिँदै फजूल खर्च नगर्न र जो जहाँ छ, त्यहीँ रहेर दशैं मनाउन आह्वान गरेका छन् ।

आफ्नो सामर्थ्यको समेत ख्याल नगरी आँखा चिम्लिएर उत्सव मनाउने वा फजूल खर्चमा हौसिने जस्ता अभ्यास कुनै पनि कोणबाट उचित होइन भन्दै प्रधानमन्त्री ओलीले यस्ता अभ्यासलाई सच्याएर हाम्रा चाडपर्वलाई मितव्ययी बनाउन आह्वान गरेका छन् ।

अहिले कोरोना भाइरस महामारीकाे विषम परिस्थितिमा हामी छाैं । चाडलाई विगतभन्दा फरक ढंगले मनाउनु हुन अनुराेध प्रधानमन्त्रीले छन् । साथै आफ्ना मान्यजनसँग टीका, जमरा ग्रहण गर्ने क्रममा अनावश्यक नजिकिँदा हुन सक्ने सम्भावित संक्रमणको खतरा ख्याल गर्न सुझाव दिएका छन् ।

ज्येष्ठ नागरिक, बालबालिका र कमजोर स्वास्थ्य भएका व्यक्तिमा संक्रमणको सम्भावना ज्यादा हुने भएकाले यसप्रति विशेष सजग भएर नै दशैं मनाउन उनले सबैमा आग्रह गरेका छन् । यसपालिको दशैं, हामी जो जहाँजहाँ छौं, त्यहीँ रहेर मनाउन प्रधानमन्त्री ओलीले सबैसँग अनुरोध गरेका छन् ।

संक्रमणको सम्भावित खतरालाई ध्यानमा राखी प्रधानमन्त्री निवास वालुवाटारमा हुने ‘दशैंको सार्वजनिक टीका कार्यक्रम’ नराख्न निर्देशन दिइएको पनि प्रमले जानकारी दिएका हुन् ।