दमक, २३ असोज । मोफसलमा नाट्य क्षेत्रको बिकासमा टेवा पुरयाँउने उद्देश्यले यहाँस्थित कदम थिएटरले दमकमा नाटक मञ्चन शुरु गरेको छ ।
शुक्रबारदेखि थियटरको सेउपाखा नाटकघरमा आजदेखि ‘तिम्रो आँखामा खसेको साँझ ’नामक नाटक मञ्चन सुुरु गरेको हो ।

रोट्राक्ट क्लब अफ दमक र कदम थिएटरको संयुक्त प्रस्तुति रहेको नाटक असोजको २५ गतेसम्म मञ्चन गरिने थिएटरकी उपाध्यक्ष चोमु शेर्पाले वताईन् । उनका अनुसार नाटक प्रत्येक दिन दिउँसोको २ बजे र साँझ ५ बजे गरि दुई शो प्रदर्शन गरिने छ ।

नाटकमा हरेक व्यक्तिको लागि समाजले निर्माण गरेको परिधी र त्यस परिधी भित्र उ कति स्वतन्त्र हुन्छ ? त्यस परिधीलाई नाघ्न समाज भित्रका व्यक्तिहरुले के कस्तो प्रयास गर्न सक्छन् भन्ने विषयलाई नाटकमार्फत चित्रण गर्न खोजिएको नाटकका परिकल्पनाकार समेत रहेका निर्देशक सागर कामीले जानकारी दिईन् ।

नाटक प्रकाश शर्माले लेखेको र त्यसमा स्थानीय नाट्यकर्मीहरु सुशान्त लिम्बू , करिना बास्तोला , सिजन दाहाल , दिपक खरेल , सोना यादब , स्वेच्छा नेपाल , युवराज भण्डारी , मनिक शंखर र रमिता राईको सशक्त अभिनय रहेको छ । कदम थियटरले दमकमा एक दशक यता नाट्य गतिविधिहरु सञ्चालन गरिआएको छ ।