लिम्बुवानखबर, काठमाडौं । काठमाडौंमा जारी मेयर कप भेट्रान्स फुटबल प्रतियोगितामा झापा भेट्रान्स फुटबल क्लबले विजयी शुरुवात गरेको छ । मंगलबार भएको दोस्रो खेलमा झापाका नरेन्द्र मणि लिम्बु चम्कदा विजय युथ हेटौडालाई ५–१ गोल अन्तरले हराउँदै झापाले विजयी शुरुवात गरेको हो ।

मंगलबार दशरथ अन्तर्राष्ट्रिय रंगशालामा भएको खेलमा झापाको नरेन्द्र मणी लिम्बुले ह्याट्रिकसहित ४ गोल गरेका थिए । यस्तै झापाकै श्याम कुमार गोलेले एक गोलको योजदानसँगै झापा ५–१ गोल अन्तरले विजयी भएको थियो । यो जितसँगै समूह ई को झापाले ३ अंक जोडेको छ ।

यता हेटौडाका कृष्ण शाक्यले एक गोल फर्काएका थिए । हेटौडाको यो पहिलो हार हो । पहिलो खेलमा हेटौडाले काभ्रे भेट्रान्सलाई हराएको थियो । हेटौडाले २ खेलमा ३ अंक जोडेको छ ।

फुटबलर्स मिसन टुगेदरको आयोजनामा जारी प्रतियोगितामा २१ टिमको सहभागिता रहेको छ । २१ टिमलाई सात समूहमा विभाजन गरिएको छ । प्रत्येक समूहका विजेता र एक उत्कृष्ट उपविजेता टिमले दोस्रो चरणमा स्थान बनाउनेछन् । ८ वटा टिम दोस्रो चरणमा प्रवेश गर्ने छ भने १३ वटा टिम पहिलो चरणबाट बाहिरिने छन् ।

प्रतियोगिताको विजेताले ५ लाख र उपविजेताले २ लाख ५० हजार पाउने पाउने छन् । त्यस्तै विधागत रुपमा उत्कृष्ट खेलाडीहरुले विशेष पुरस्कार प्राप्त आयोजकले जनाएको छ ।