दमक, २१ असोज । लिम्बुवान आन्दोलनको क्रममा २०६४ असोज २० गते शहादत्ता प्राप्त गर्नुहुने शहिद राजकुमार आङदेम्बे माङतोकको १५औं स्मृति दिवस मनाइएको छ । शहिद राजकुमार आङदेम्बे माङतोक–मनिल तामाङ् स्मृति प्रतिष्ठानको आयोजनामा कमलस्थित सानो केर्खा समाधिस्थलमा झापा, मोरङ र इलाम जिल्ला लगायतबाट उपस्थितभई विहिबार मनाइयो ।

प्रतिष्ठानका उपाध्यक्ष जीत कुमार आङदेम्बेको अध्यक्षतामा आयोजित कार्यक्रममा संघीय लोकतान्त्रिक राष्ट्रिय मञ्चका महासचिव अशोक चेम्जोङ्को प्रमुख आतिथ्यतामा कार्यक्रम भएको उक्त कार्यक्रममा लिम्बुवान मञ्चका बरिष्ठ उपाध्यक्ष ज्ञानुहाङ इम्बुङ, लिम्बुवान नेता सुर्य योक्पाङदेन र चुलाचुली १ का निर्वाचित वडाध्यक्ष तथा लिम्बुवानका सचिवालय सदस्य पूर्ण लावती धूवले शहिद माङतोकको जिवनी बारे चर्चा गर्नुभएको थियो ।

लिम्बुवान मञ्चका उपाध्यक्ष थाङहाङ लावती, विष्णुमाया थापा, संघीय सहसचिव नन्दु मेन्याङबो, संघीय सचिवालय सदस्य बलनाथ नाल्बो, एविश्चा लाबुङ, लिम्बुवानका नेताहरु कविन्द्र सेर्मा, मनकुमार थलङ लगायत नेताहरुको उपस्थिति रहेको थियो । कार्यक्रमलाई लिम्बुवान भोलेन्टियर्सका सहकमाण्डरहरु बसन्त सुब्बा र मण्डेम लिम्बुले विशेष सहजीकरण गर्नुभएको थियो । कार्यक्रम प्रतिष्ठानका महासचिव दिलकुमार लावतीले संचालन गरेको थिए ।

उक्त कार्यक्रममा समाथिस्थल पून निर्माणको लागि सुर्य योक्पाङदेनको संयोजकत्वमा पाँच सदस्यीय समिति गठन भएको छ । समितिको सदस्यहरुमा बसन्त सुब्बा, दिलीप खजुम, शुक्रर लावती (जम्मू) र दुर्गा चेम्जोङ रहेको प्रतिष्ठानका महासचिव लावतीले बताए ।

यसरी नै माङतोकको चुलाचुली १ स्थित निर्मित शालिकमा मञ्चका उपाध्यक्ष ज्ञानुहाङ इम्बुङको प्रमुख आतिथ्यतामा खादा अर्पण गर्दै शहिद माङतोकको सम्मान गरिएको छ । उक्त कार्यक्रममा मञ्चका सल्लाहकार विक्रम वनेम लगायत नेताहरुको उपस्थिति रहेको थियो । यसरी नै विहीबार साँझ माङताेककाे शालिकमा दिप प्रज्वलन समेत गरिएकाे थियाे ।

यसैगरी शहिद माङतोकको स्मृतिमा पान्थरको फिदिम, सुनसरीको धरान, ताप्लेजुङ लगायत विभिन्न जिल्लाहरु र काठमाडौं उपत्यका लगायत विभिन्न प्रवासहरुमा समेत १५औं स्मृति दिवस मनाइएको छ ।