• रासस

काठमाडौं । राष्ट्रिय समाचार समिति (रासस)का महाप्रवन्धक ओपेन्द्र शर्मालाई कोरोना संक्रमण पुष्टि भएको छ । महाप्रवन्धक शर्मा हाल होम आइसोलेशनमा छन् ।

पारिवारिक स्रोतका अनुसार उनमा शरीर दुख्ने, खोकी लाग्नेजस्ता कोराना संक्रमणका सामान्य लक्षण देखिएको छ ।

स्वास्थ्यसम्बन्धी सबै मापदण्ड पालना गर्दागर्दै आफू संक्रमित भएको उनले सामाजिक सन्जालमार्फत् जानकारी दिए पछि काेराेना संक्रमण पुष्टि  भएकाे हाे । उनले आफूसँग सम्पर्कमा रहेका सबैलाई आइसोलेशनमा रहन र आफ्नो स्वास्थ्यको ख्याल राख्न पनि आग्रह गरेका छन् ।

यसअघि उनका दाजु एवम् नेकपाका नेता जनार्दन शर्मा (प्रभाकर), भाउजु र भाई अनिल शर्मालाई पनि कोरोना संक्रमण देखिएको थियो ।

रासस महाप्रवन्धक शर्मा भने स्वास्थ्य मापदण्ड पालना गर्दै नियमित कार्यालयमा उपस्थित रहेको राससले जनाएको छ । महाप्रवन्धक शर्मासँगै उनका चालक लीलाराम देवकोटालाई पनि आजै कोरोना संक्रमण पुष्टि भएको छ । उनी पनि होम आइसोलेशनमा छन् ।