काठमाडौं । राष्ट्रिय प्रजातन्त्र पार्टी (राप्रपा)ले हिन्दु राष्ट्र र राजसंस्थाको पुनस्र्थापनाको माग गर्दै आगामी पुस १७ गते उपत्यकामा जनप्रदर्शन गर्ने जनाएको छ ।

शनिबार काठमाडौंमा आयोजित उपत्यकास्तरीय अगुवा नेता तथा कार्यकर्ता भेलालाई सम्बोधन गर्दै राप्रपाका अध्यक्ष पशुपतिशमशेर राणाले हिन्दु राष्ट्र र राजसंस्थाको पक्षमा देशभर उठेको आवाजमा समर्थन गरिएको बताएका छन् । उनले राप्रपाले झापा, मकवानपुर लगायतका जिल्लामा प्रदर्शन गरिसकेको भन्दै आगामी पुष १७ गते काठमाडौं उपत्यकामा पनि प्रदर्शन गर्न लागेको बताए ।

सरकारले जनताको अभिमतको दुरुपयोग गरिरहेको, महँगी नियन्त्रण, बेरोजगारी समस्या समाधान गर्न, भ्रष्ट्राचार नियन्त्रण गर्न, संगठित धर्म परिवर्तन रोक्न सरकार असफल भएकाले पनि राप्रपा सडकमा उत्रनुपरेको हो । –अध्यक्ष राणाले बताएका छन् ।

अर्का अध्यक्ष डा. प्रकाशचन्द्र लोहनीले कार्यक्रममा बोल्दै जनताले चाहेको परिवर्तनलाई संस्थागत गर्न पनि आन्दोलन आवश्यक रहेको बताए ।