दमक, १९ मंसिर ।  पाँचथर जिल्लाको फालेलुङ गाउँपालिकामा प्रदेश नं.१ पुनः नामाङकन संयुक्त संघर्ष समिति र पहिचानका लागि युवा दस्ता गठन भएको छ।

पहिचानवादीहरुको भेलाले धन बहादुर केरुङको संयोजकत्वमा २१ सदस्यीय संयुक्त संघर्ष समिति र दिपक आङथुपोको संयोजकत्वमा २१ सदस्यीय पहिचानका लागि युवा दस्ता गठन भएको हो।

प्रदेशको नाम ‘कोशी’ खारेज गरी पहिचानकाे आधारमा पुनः नामाङकन गरिनुपर्ने माग सहित ०७९ फाल्गुन १८ गते देखि भइरहेको आन्दोलनलाई गाउँ–गाउँबाट समेत सशक्त बनाउन संघर्ष समिति र युवा दस्ता गठन गरिएको बताइएको छ।

प्रदेश नं.१ पुनः नामाङकन संयुक्त संघर्ष समिति फालेलुङका इन्चार्ज नुनाम लिम्बू केरुङको उपस्थितिमा छलफल, अन्तरक्रियासँगै संघर्ष समिति र युवा दस्ता गठन गरिएको युवा दस्ताका संयोजक आङथुपोले बताए ।