लिम्बुवानखबर । नेपाली घरेलु टिमले भारतसँगको पहिलो मैत्रीपूर्ण खेल बराबरीमा रोकिएको छ । बिहीबार साँझ त्रिपुरेश्वरस्थित दशरथ रंगशालामा भएको खेलमा नेपालले भारतसँग १–१ गोलको बराबरी खेलेको हो ।

सुरुवाती समयमा अग्रता लिएको नेपाली टिमले अग्रता जोगाउन नसक्दा घरेलु दर्शकसामु नेपाल बराबरीमा रोकिएको हो ।

खेलको पहिलो हाफको ३६औं मिनेटमा अन्जन विष्टले गोल गर्दै नेपाललाई सुरुवाती अग्रता दिलाएका थिए । भारतका चिन्गेलसना सिंह कोनसामको ब्याक पासमा अन्जनले गोल गरेका थिए ।

तर, खेलको दोस्रो हाफको ६०औं मिनेटमा अनिरुद्ध थापाले गोल गर्दै भारतलाई १–१ गोलको बराबरीमा फर्काएका थिए ।

भारतका कप्तान सुनिल क्षेत्रीको प्रहार नेपालका गोलकिपर किरण चेम्जोङ बचाएका थिए । तर, त्यहि रिबाउन्ड बलमा थापाले गोललाइनबाट पोस्टको जाली चुमाएका थिए । कोरोना संक्रमणको जोखिम मोल्दै मैदानमा हजारौं दर्शकहरु नेपाली घरेलु टिमलाई साथ दिन उपस्थित भएका थिए ।

अब नेपाल र भारतबीचको दोस्रो मैत्रीपूर्ण खेल आइतबार हुनेछ ।