दमक । झापाको दमक ६ मा संचालित एड्भान्स मल्टिस्पेसियलिटी हस्पिटलको अध्यक्षमा माधव पराजुली चुनिएका छन् । अस्पतालको आफ्नै सभाहलमा आज सम्पन्न ५ औँ वार्षिक साधारणसभाले पराजुलीको अध्यक्षतामा ९ सदस्यीय अस्पताल सञ्चालक समिति सर्वसम्मत रूपमा चयन गरेको छ ।

नव गठित समितिको उपाध्यक्षमा कृष्ण तिम्सिना, सचिवमा परशुराम खरेल रहेका छन् भने सदस्यहरूमा डा. अनिल थापा, दीपक खरेल, डा.केपी सुबेदी, ऐश्वर्या तिम्सिना, भूपालराज कटुवाल र नारायण केसी रहेको अस्पतालका प्रशासक चैतन्य बरालले जानकारी दिए ।

यस्तै साधारण सभाले अस्पतालको नयाँ भवन बनाउने तथा थप सेवा सुविधा बिस्तार गर्दै लैजाने निर्णय समेत पारित गरेको समितिका निर्वाचित सदस्य दीपक खरेलले बताए । उक्त साधारणसभाबाट नवनिर्वाचित अध्यक्ष पराजुलीले अस्पतालमा थप सेवा सुविधा बिस्तार गर्दै लैजाने प्रतिबद्धता जनाएका छन् । उनले साधारण सभाले पारित गरेका योजनाहरू अंक्षरस पालना गराउन आफू दत्तचित्त भएर लाग्ने बताए । “अस्पतालले दमक लगायत छिमेकी स्थानीय तहका सेवाग्राहीहरूलाई समयानुकूल सेवाहरू पुरयाँउन सदैव प्रतिवद्ध रहनेछ”–उनले वताए ।