काठमाण्डौँ। सुमधुर स्वरकी धनी विशेष गरेर लिम्बु गायिकाको रुपमा स्थापित मनु नेम्बाङ्को श्वासप्रश्वासमा गम्भीर समस्या देखिएको छ । लामो समय बेलायतको बसोबासपछि नेपाल फर्केका गायिका नेम्बाङ अस्पतालबाट डिस्चार्ज भई घरमा उपचार भइरहेको बताइन् ।

गत २०७६ सालको तिहारमा कार्यक्रमको लागि बेलायत पुगेको गायिका नेम्बाङ लकडाउनको कारण लामो समय बेलायतमै रहदा हावापानी नमिलेको कारण खोकी लाग्दै आएपनि उचित उपचार नहुँदा फोक्सोमा संक्रमण अर्थात इन्फेक्सन् भइ गम्भीर समस्या देखिएको उपचारमा संलग्न डा.आषिश श्रेष्ठले बताएका छन् ।

छाती दुख्ने समस्य बढ्दै गएपछि जाँचको क्रममा फोक्सोमा समस्या देखिएको गायिका नेम्बाङले बताइन् ।
चेकजाँचको लागि पाटन अस्पतालमा भर्ना भएपनि श्वासप्रश्वासमा खराबी आएपछि स्वास्थ्य चिन्ताजनक अवस्थामा रहेकोले आपतकालिन उपचारको लागि सुमेरु अस्पताल पुल्चोकमा भर्ना गरिएको थियो ।

काभिड १९ महामारीको कारण अस्पतालमा बस्न असहज महसुस भएको साथै अहिले स्वास्थ्य सुधारन्मुख हुँदै आएपछि चिकित्सकको निगरानीमा हाल गायिका नेम्बाङको आफ्नै निबासमा उपचार भइरहेको बताइएको छ ।

चिकित्सकले उनलाई केही समयको लागि कोही कसैसँग भेटघाट तथा बोलचाल नगर्न समेत सुझाव दिएका छन् ।
फोक्सोमा परेको संक्रमण र औषधीको असरले निकै सिथिल बनाएको गायिका नेम्बाङले बताइन् ।