दमक। संघीय लोकतान्त्रिक राष्ट्रिय मञ्चले आर्थिक बर्ष ०७६/०७७ को लेखापरिक्षणको प्रतिवेदन निर्वाचन आयोगमा बुझाएर पार्टी नविकरण गरेको जनाएको छ । पुष मसान्त भित्रमा सबै राजनीति दलले निर्वाचन आयोगमा पार्टी नविकरण गर्न आर्थिक प्रतिवेदन र पार्टीले गरेको गतिविधिहरुको विवरण निर्वाचन आयोगलाई बुझाउनु पर्ने प्रावधान रहेको छ ।

मञ्चका अध्यक्ष कुमार लिङ्देन मिराकले हरेक बर्ष निर्वाचन आयोगमा संघीय लोकतान्त्रिक राष्ट्रिय मञ्चलाई संस्थागत गर्न नविकरण गर्दै आएको बताएका छन् । २०६४ सालमा निर्वाचन आयोगमा दर्ता भई पहिलो संविधानसभामा २ जना संसद पठाउन सफल पार्टी १४औं दलको हैसियत पाएको पार्टी हो ।

३३ दलीय मोर्चामा सामेल भई दोस्रो संविधानसभा चुनाव बहिष्कार गरेको मञ्चले एतिहासिक पहिलो स्थानीय निर्वाचन र प्रतिनिधि तथा प्रदेश निर्वाचनमा भने भाग लिएको थियो ।

निर्वाचन आयोगले थ्रेस होल्डको प्रावधान राखेपछि प्रदेश नं. १ मा थ्रेसहोल्ड कटाउन सफल भई संघीय मञ्चको हाल १ जना प्रदेश सदस्य रहेको छ । यो राजनीति दल नेपालको एक मात्र संघीय ढाँचाको राजनीति दल हो । यो दलले आफ्नो विधान मै १०+१ प्रान्तको खाँका सहितको प्रदेश स्तरीय राजनीति दलको रुपमा चलायमान बनाउन सकिने प्रान्तीय मञ्चको अवधारणा समेत स्पष्ट लेखेको छ ।

संघीय मञ्चले संघीय सामुदायिक समाजवाद, संघीय सह–अस्तित्ववाद र संघीय इको इकोनोमी लगायतको आफ्नो राजनीति दर्शनलाई संस्थागत गर्न हाल मेचीकाली जागरण अभियान समेत गरिरहेको मञ्चका संघीय अध्यक्ष लिङ्देन बताउँछन् ।