लिम्बुवानखबर, दमक । झापाको दमकस्थित दुम्सेमा मंगलबार साँझ ८ बजेतिर जंगली हात्तीको आक्रमणबाट स्थानीय एक जना बृद्धको ज्यान गएको छ । आक्रमणबाट दमक ३ गोलाटार निवासी ६२ बर्षिय गणेश अधिकारीको निधन भएको हो ।

दमक ३ का वडाध्यक्ष नविन बरालका अनुसार मकैबारीमा पानी लगाउनका लागि कुलोमा गएको बेला जंगली हात्तीको आक्रमणबाट उनको ज्यान गएको बताए । आक्रमणबाट घटनास्थलमा नै बृद्धको ज्यान गएको थियो ।

दमकस्थित दुम्से क्षेत्रलाई हात्ती प्रभावित क्षेत्र मानिन्छ । दुई वर्षपछि दमकमा हात्तीले फेरि मान्छेको ज्यान लिएको वडाध्यक्ष बरालले बताए । घटना पछि गाउँलेले हात्तीलाई बस्तीसंगैको जंगलतर्फ हात्ती धपाएका थिए ।

दमक ३ का वडावासीहरुलाई हात्तीको आक्रमणबाट बच्नका लागि होशियारी अपनाउन समेत वडाध्यक्ष बरालले आग्रह गर्दै आइरहेको बताएका छन् ।