काठमाडौं। नेपाली लेग स्पीनर सन्दीप लामिछाने इन्डियन प्रिमियर लिग (आईपीएल) को १४ औं संस्करणका लागि कुनै पनि टिममा अनुबन्ध हुन सकेनन् ।

यो सिजनको लागि नेपालबाट हालसम्म आईपीएल खेल्ने एकमात्र खेलाडी लामिछानेलाई ४० लाख भारु न्युनतम मूल्य राखिएको थियो । उनलाई चेन्नाईमा भइरहेको अक्सनमा कुनै पनि टिमले किनेन ।

दिल्ली क्यापिटल्समा तीन सिजन बिताएपछि सन्दीपलाई दिल्लीले रिलिज गरेको हो । गत सिजन दिल्ली फाइनलमा पुग्दा सन्दीपले एक खेल पनि खेल्न पाएका थिएनन् ।

चेन्नाई अक्सनमा सन्दीपलाई खरिद गर्न कुनैपनि टोलीले रुचि देखाएनन् । नेपाली क्रिकेट प्रेमीहरुलाई यतिवेला दुःखी बनाएको छ । तर अन्तिम समयमा कुनै टोलीले आग्रह गरेमा उनी अक्सनमा पुनः आउन सक्छन् । अनसोल्ड भएका खेलाडी अन्तिम समयमा विक्री भएमा न्यूनतम मूल्यमा खेल्ने सम्भावना रहेको जानकारहरु बताउँछन् ।

सन् २०१८ मा दिल्लीबाट सन्दीपले पहिलो पटक आइपिएल खेलेका थिए । न्यूनतम ३२ लाखमा अनुबन्ध भएका थिए उनलाई गत सिजनमा दिल्लीले पूरै बेन्चमा राखेको थियो । यस बर्ष दिल्लीले फुकुवा गरेपछि सन्दीप अक्सनमा सहभागी भएका थिए ।

दिल्लीबाट तीन सिजन विताउँदै सन्दीपले कुल ९ खेलमा १३ विकेट लिएका थिए । गत सिजना पुरै समय बेन्चमा बसेपनि २०१८ मा ३ खेलमा ५ र २०१९ मा ६ खेलमा ८ विकेट लिएका थिए ।