ताप्लेजुङ्। ताप्लेजुङकै दोस्रो ठूलो दोभान बजारमा आगलागी हुँदा ४० बढी घर जलेर नष्ट भएका छन् । आज बिहान करिब ९ बजेदेखि सुरु भएको आगलागी अझै नियन्त्रणमा आउन सकेको स्थानीय नेता मुक्साम लाबुङ्ले बताएका छन् । मेरिङदेन गाउँपालिका ३ खाम्लुङमा रहेको यो बजार ताप्लेजुङकै पुरानो बजार हो ।

आगो नियन्त्रणको प्रयास भइरहेको ताप्लेजुङ प्रहरी प्रमुख डिएसपी बालनरसिंह राणाले बताए । उनका अनुसार स्थानीयले ४० घर जलेको जानकारी प्रहरीलाई दिएका छन् । स्थानीय भोलानाथ पौडेलको घरबाट आग्लागी शुरुभएको बताइएको छ । थप क्षति हुन नदिन स्काभेटरले भौतिक संरचनाहरु भत्काईएको बताइएको छ ।

आगो निभाउन ताप्लेजुङ नगरपालिकाको दमकल प्रयोग गरिएको छ । ताप्लेजुङबाट दोभान बजार पुग्न गाडीमा करिब एक घण्टा लाग्छ ।

के कति क्षति भयो भनेर अहिलेसम्म कुनै विवरण आएको छैन । आगलागीको कारण खुलेको छैन । आगोले पुर्याएको क्षतिको विवरण पनि आउन बाँकी छ ।

यहाँ काठले बनेका कच्ची घरहरु धेरै छन् । बाटो पनि साँघुरो छ । दोभान बजारमा एक सय जति घरहरु रहेको स्थानीय बताउँछन् ।