सुनसरी/ नेपाली कांग्रेसको आसन्न १४ औं महाधिवेशन नजिकिदै गर्दा कांग्रेस इतिहास बोकेको कोइराला परिवार एकभएर जाने भएका छन । बिहीबार सुनसरीमा आयोजित एक कार्यक्रममा डा. शेखर कोइराला, शंशाक कोइराला र सुजता कोइरालाले कोइराला परिवार १४ औं महाधिवेशनमा एक भएर जाने उद्घोष गरेका हुन् ।

पछिल्लो समय कोइराला परिवारबाट राजनीतिमा सक्रिय रहेका तीनै जना नेताहरुले एउटै मञ्चबाट त्यस्तो उदघोष गरेपछि कांग्रेस वृत्तमा त्यसले नयाँ बहस शुरुभएको छ । आउँदो १४औ महाधिवेशनमा तीनै जनाले कोइराला परिवारबाट एक मात्र सभापतिको उम्मेदवार हुने पनि बताइसकेका छन् ।

महामन्त्री शशांक कोइरालाले १४ औं महाधिवेशनमा कोइराला परिवार एक भएर अघि बढ्ने बताए । उनले कोइराला परिवारका नेता एक ठाउँमा रहेको र महाधिवेशनमा पनि मिलेर अघि बढ्ने बताए । शशांकले कोइराला परिवारबीच कुनै समस्या आउन नदिन भूमिका खेल्ने पनि प्रष्ट पारे ।

नेता शेखर कोइरालाले भाइ शशांक र बहिनी सुजातालाई हेर्दै १४ औं महाधिवेशनमा कोइराला परिवार एक भएर अघि बढ्ने बताएका थिए । १४ औं महाधिवेशनमा सभापतिको लागि तयारी गर्दै १३ औ महाधिवेशन पछि डाक्टर शेखर देश दौडाहामा छन् । त्यसरी नै नेतृ सुजाता कोइरालाले कार्यकर्ताको भावना बमोजिम सहकार्य र सहमत्तिबाट कोइराला परिवार अगाडी बढने बताइन् ।

कोइराला परिवारको विरासत थाम्न नसकेको भन्दै आलोचना खेपिरहेका त्रय नेताहरुको यो उदघोष्ले कांग्रेसमा नयाँ सन्देश जाने नेताहरुले स्पष्ट पारेका छन् ।