दमक, २२ फाल्गुन । संघीय लिम्बुवान प्रान्तीय मञ्च, नेपाल दमक वडा नं. १ ले एकदिन राजनैतिक प्रशिक्षण कार्यक्रम सम्पन्न गरेको छ । मञ्चका प्रान्तीय उपमहासचिव धनराज सुब्बाले मञ्चको सांगठानिक संरचना, अर्थनीति र राजनैतिक दर्शनबारे प्रशिक्षण गराएका थिए ।

शनिबार आयोजित कार्यक्रम मञ्चको वडा नं. १ का अध्यक्ष उदय माङ्लाकको सभाध्यक्षतामा आयोजित कार्यक्रममा दमक नगर अध्यक्ष याम लिम्बु, उपाध्यक्ष टंक केरुङ् लगायत नेताहरुले शुभकामना मन्तव्य राखेका थिए । कार्यक्रममा वडाका ४० भन्दा धेरै नेता कार्यकर्ताहरुले प्रशिक्षण लिएका थिए ।

दमकमा विगत ३० बर्ष देखी ब्रिटिस ल्याङ्वेज संचालन गरेर बसेका सुब्बासँग शिक्षण पेशामा लामो अनुभव रहेको छ । दमकमा कुनै ताका ल्याङ्वेज सेन्टरको नाम लिनु पर्दा ब्रिटिस कै पहिलो पंक्तीमा आउँथ्यो । उनै सुब्बा पहिचान, संघीयता, लिम्बुवानसँग १०+१ प्रान्त हुनुपर्छ भनेर विगत १५ बर्ष देखि निरन्तर पहिचानको राजनीतिमा खटिरहेका नेता हुन् ।

कार्यक्रममा दमक नगर सल्लाहकार गुमानसिंह सम्बाहाम्फे, नगर अर्थसचिव सीता केरुङ् लगायत नेताहरुको पनि उपस्थिति रहेको थियो ।