पाँचथर, १५ चैत / लेखक अमर नेम्बाङ लिम्बूको नाममा स्थापित अमर नेम्बाङ लिम्बू स्मृति पुरस्कार–२०७८ बाट लेखक शारदा सुब्बा र बिना थिङ मंगलबार फिदिममा पुरस्कृत भएका छन् ।

फिदिमस्थित मनश्वी होटलको सभाहलमा आयोजित कार्यक्रममा लेखक थिङलाई कार्यक्रमका प्रमुख अतिथि, नेपाली काँग्रेसका केन्द्रीय सदस्य राजीव ढुंगाना लगायतले सम्मान–पत्र, दोसल्ला र पुरस्कार राशी हस्तान्तरण गरेका थिए । पुरस्कारको राशी नगद ६० हजार रुपैंयाँ रहेको छ ।

पुरस्कार ग्रहणपछि कार्यक्रममा बोल्दै लेखक थिङले राज्यले अस्वीकार गरेको तामाङशालिङ भूमीबाट लिम्बुवान भूमीसम्म आएर पुरस्कृत हुन पाउँदा हर्षले बिभोर बताएको बताइन् । उनले अमर नेम्बाङ लिम्बूको ‘मेरै जिन्दगी रहेछ’ सँगै ‘कालो गुराँस’ शीर्षको आफ्नो कविता सुनाइन् ।

अर्का पुरस्कृत स्रष्टा शारदा सुब्बा भने बिशेष कारणवस पुरस्कार वितरण समारोहमा उपस्थित हुन नसकेको आयोजक अमर नेम्बाङ लिम्बू स्मृति प्रतिष्ठानले जनाएको छ ।

कार्यक्रममा फाल्गुनन्द गाउँपालिकाको जेहेन्दार विद्यार्थीको रुपमा सिद्धदेवी मावि, फाल्गुनन्द–१, नवमीडाँडाका छात्रा मनिषा चेम्जोङलाई नगद दश हजार रुपैंयाँ छात्रवृत्ति प्रदान गरिएको थियो । त्यस्तै जिल्लाका बाढीपहिरो तथा आगलागि पीडितलाई पनि राहत प्रदान वितरण गरिएको अमर नेम्बाङ लिम्बू स्मृति प्रतिष्ठानका अध्यक्ष मुनेन्द्र नेम्बाङले बताए ।