ललितपुर, २६ फागुन । किरात याक्थुङ चुम्लुङ संघीय समितिले प्रदेश सभामा किरात लिम्बुवान सगरमाथा नामाकरण दर्ता गरेका पूर्व मुख्यमन्त्री सहित ५ जना प्रदेशसभा सदस्यहरुलाई धन्यवाद ज्ञापन गरेको छ ।

शुक्रबार कोशी प्रदेशका प्रदेश सभा सदस्यहरु राजेन्द्र कुमार राई, निर्मला लिम्बू, कमल प्रसाद जबेगु, खिन लङ्वा र बिद्या चाम्लिङ्लाई खदा ओढाएर धन्यवाद, बधाई तथा शुभकामना ज्ञापन गरेका हुन । उनीहरुलाई कियाचूको ललितपुरस्थित चुम्लुङ् हिममा एक कार्यक्रमको आयोजना गरि सम्मान गरिएको हो ।

गत फागुन १७ गते प्रदेश १ को प्रतिपक्षी दल नेकपा (एकीकृत समाजवादी) र सत्तारूढ दल जनता समाजवादी पार्टी नेपाल(जसपा) ले संयुक्त रूपमा किरात–लिम्बुवान–सगरमाथा प्रदेश नामकरणका लागि प्रदेशसभा सचिवालयमा प्रस्ताव दर्ता गराएका थिए ।

दर्ता गरिएको प्रस्तावमा एकीकृत समाजवादीका नेता तथा पूर्वमुख्यमन्त्री राजेन्द्रकुमार राई प्रस्तावक र स्वास्थ्यमन्त्री तथा जसपाकी प्रदेश सांसद निर्मला लिम्बू र एकीकृत समाजवादीका कमलप्रसाद जबेगु समर्थक रहेका थिए । सो प्रस्तावको पक्षमा खिनु लङ्वा र विद्या चाम्लिङ रहेको थिए ।