विराटनगर । विराटनगरमा जारी छैठौं विराट गोल्ड कपमा विभागीय टिम सशस्त्र प्रहरी बल (एपीएफ) काठमाडौं सेमिफाइनलमा प्रवेश गरेको छ ।

सोमबार भएको तेस्रो क्वाटरफाइनल खेलमा साविकको विजेता नेपाल प्रहरीलाई २ को विरुद्ध ० गोल अन्तरले हराउँदै एपीएफ सेमिफाइनलमा प्रवेश गरेको हो ।

जितसँगै एपीएफले वैशाख १ गते हुने पहिलो सेमिफाइनल खेलमा घरेलु टिम विराटनगर–११ सँग प्रतिस्पर्धा गर्नेछ ।

नेपाल पुलिस क्लबले क्वाटरफाइनल खेलमा हार व्यहोरेपछि छैठौं संस्करणको विराट गोल्डकपको उपाधि चुम्ने सपना चकनाचुर भएको छ । अघिल्लो सिजनमा भने खेल कोभिडको कारण रोकिएको थियो । पुलिसले २०७४ सालमा विराट गोल्डकपको उपाधि हात चुमेको थियो ।

आक्रम रुपमा प्रस्तुत भएको प्रहरीलाई रोक्दै एपीएफलाई खेलको ४६ औं मिनेटमा मणि लामा र ९० औं मिनेटमा सुमन लामाले गोल गरि टिमको जित सुनिश्चित गरेका थिए । खेलको ४६ औं मिनेटमा एपीएफका मणिले पुलिसका खेलाडीले क्लियर गरेको बलललाई गोलमा परिणत गरि अग्रता दिलाएका थिए ।

खेलको म्यान अफ द म्याच एपीएफका मणि लामा घोषित भए । उनले नगद १० हजार रुपैयाँ प्राप्त गरेका छन् ।

जितपछि प्रतिक्रिया दिँदै सशस्त्र प्रहरीका प्रशिक्षक सुदिप श्रेष्ठले खेलाडीहरुको मेहनतले विभागीय टिमलाई हराउन सफल भएको बताए । यसै गरी प्रहरीका प्रशिक्षक अन्नतराज थापाले भने डिफेन्डरको कम्जोर खेलका कारणले प्रस्पिर्धाबाट बाहिर बाध्य भएको बताए ।

मंगलबार अन्तिम क्वाटरफाइन खेल पोखरामा सम्पन्न १९ औं संस्करणको आहा रारा गोल्डकपको बिजेता टिम संकटा र अफ्रिकन रुट्सबीच प्रतिस्पर्धा हुनेछ ।