झापा। मेचीनगरको वडा नं १५ नीलकोठीस्थित ब्रिकेट उत्पादन गर्ने बायोग्यास कारखानामा भीषण आगालागी भएको छ । आज बिहान ३ बजेदेखि सो कारखानामा भीषण आगलागी भएको हो ।

जिल्ला प्रहरी कार्यालय झापाका सूचना अधिकारी राकेश थापाका अनुसार बिहान ३ बजेतिर आगलागी शुरु भएको हो । आगलागी के कारणले भयो अझैसम्म खुल्न सकेको छैन । यद्यपी कोइला पोल्न राखिएको भुस सल्किएर आगो लागेको हो कि भन्ने अनुमान रहेको छ ।

आगो निभाउन सशस्त्र प्रहरी, नेपाल प्रहरी र सर्वसाधारणको ठूलो संख्याले सघाएका थिए । आगलागी नियन्त्रणमा लिन भद्रपुर, मेचीनगर, बिर्तामोड, दमक, पथरी र उर्लाबारी, कानेपोखरीबाट दमकल आएका थ्एि ।

कारखानामा काठदाउराको ठूलो थुप्रो रहेको हुँदा आगो निभ्न समय लागेको हो । धुलाबारीबाट करीब सात किलोमिटर दक्षिण भद्रपुरसँग सीमा जोडिएको गाउँमा भद्रपुरका आदित्य पराजुलीलगायत उद्योगीले ब्रिकेट कोइला उत्पादनका लागि कारखाना सञ्चालन गरेका थिए । आगलागीको क्षतिको विवरण यकिन नभइसकेको प्रहरीको भनाइ छ ।