काठमाडौं । धनगढी एफसी पहिलो संस्करणको फ्रेन्चाईज फुटबल प्रतियोगिता नेपाल सुपर लिग (एनएसएल) को फाइनलमा प्रवेश गरेको छ ।
आज भएको पहिलो प्लेअफमा काठमाडौं रेजर्सलाई अतिरिक्त समयमा २–१ गोल अन्तरले पराजित गर्दै धनगढी फाइनल पुगेको हो ।
त्रिपुरेश्वरस्थित दशरथ रंगशालामा धनगढीलाई जित दिलाउन पुजन उपरकोटी र विशाल राईले एक एक गोल गरे । काठमाडौंका तेज तामाङले एक गोल फर्काएका थिए तर जितका लागि त्यो सम्भव भएन ।
खेलको निर्धारित ९० मिनेटको समय १–१ गोलको बराबरीमा सकिएपछि खेल अतिरिक्त समयमा गएको थियो ।
अतिरिक्त समयमा मार्की खेलाडी विशाल राईचम्किएपछि धनगढी फाइनल पुगेको हो । खेलको १ सय ८ औं मिनेटमा रमेश दंगालको पासमा अनमार्क रहेका विशालले गोल गर्दै टिमलाई फाइनलको यात्रा तय गराए ।
रोमान्चक बनेको खेलको पहिलो हाफ गोलरहित बराबरीमा सकिएको थियो । पहिलो हाफमा काठमाडौं आक्रमकरुपमा प्रस्तुत भएका थिए तर गोल गर्ने सुन्दर अवसरहरु गुमाउन पुगेको थियो ।
खेलको दोस्रो हाफ भने खेल थप रोमान्चक बन्यो । ७५औं मिनेटमा तेज तामाङले गोल गर्दै काठमाडौंलाई १–० को अग्रता दिलाएका थिए । विदेशी खेलाडी मेसौकको क्रसमा वान टचमा गोल गरेका थिए । तर, खेलको ७८औं मिनेटमा पुजन उपरकोटीको उत्कृष्ट गोलसँगै धनगढीले बराबरी गोल फर्काएका थिए । फ्रान्कलिनको हेडर पासमा काठमाडौंका गोलकिपर विकेश कुथु अगाडी बढेको फाइदा उठाउदै पुजनले बाइसाइकल गोल गरेर खेल बराबरीमा ल्याएका थिए ।
खेलमा धनगढीका विदेशी खेलाडी फ्रान्कलिन कुइटे प्लेयर अफ दि म्याच चुनिए । उनले २५ हजार र ट्रफि हात पारेका छन् । त्यसैगरी इमर्जिङ प्लेयर अफ दि म्याच धनगढीका सौजन राई चुनिए उनले १० हजार प्राप्त गरे ।
धनगढीसँग पराजित काठमाडौंले अब फाइनल प्रवेशको लागि इलिमिनेटर खेल खेल्नेछ । इलिमिनेटरमा काठमाडौंले ललितपुर सिटी र बुटवल लुम्बिनी एफसीबीचको विजेतासँग खेल्नेछ ।
ललितपुर र बुटवलबीचको दोस्रो प्ले अफ बुधबार हुनेछ ।
Related