लिम्बुवानखबर डेस्क । आज नेपालले इराकविरुद्ध मैत्रिपूर्ण फुटबल खेल खेल्दैछ । नेपाली समय अनुसार आज राति १०ः१५ बजे इराकको बसरास्थित अल्फायहा अन्तराष्ट्रिय खेल मैदानमा नेपाल र इराक बिच मैत्रिपूर्ण खेल हुँदैछ ।
नेपालले सन् २०२२ मा कतारमा आयोजना हुने फिफा विश्वकप तथा एसियन कप छनोट अन्तर्गत बाँकी खेलको तयारीका लागि इराकसँग मैत्रीपूर्ण खेल खेल्न लागेको हो ।
फिपाले विहीबार सार्वजनिक गरेको वरीयतामा नेपालभन्दा १०३औं स्थान माथि इराक ६८औं स्थानमा रहेको छ । नेपाल फिपा वरीयतामा १ सय ७१ औं स्थानमा छ ।
इराकविरुद्धको खेल कुवेती प्रो लाईसेन्स प्राप्त प्रशिक्षक अब्दुल्लाह अलमुताईरीको पहिलो खेल हुनेछ । उनी औषत २३ वर्षका खेलाडी बोकेर इराक पुगेका छन् । यहि टोलीले विश्वकप छनोटका बाँकी ३ खेल खेल्नेछ ।
नेपाल र इराकबीच यो चौंथो भेट हो । यस अघि नेपाल र इराकले ३ खेलमा प्रतिस्पर्धा गरेका छन् । तीनै खेलमा इराकले नेपाललाई ‘क्लिन स्विप’ गरेको छ । तीन खेलमा इराकले १६ गोल गरेको छ भने नेपालले ३ गोल मात्र फर्काउन सकेको छ ।
मुख्य प्रशिक्षक अलमुताईरीले यस पटक नेपाली टिममा ठूलो परिवर्तन गरेका छन् । पछिल्लो समय थ्री नेसन्स कपको उपाधि विजेता टोलीबाट उनले १० खेलाडीलाई मात्रै टिममा लिएका छन् । उनले ६ नयाँ खेलाडीलाई टोलीमा अवसर दिएका छन् ।
अब नेपालले जुन ३ मा ताइपे, जुन ७ मा जोर्डन र जुन ११ मा अष्ट्रेलियासँग खेल्नेछ । इराकसँगको मैत्रीपूर्ण खेलपछि नेपाली टोलि स्थलमार्ग हुँदै कुवेत जानेछन् । २३ खेलाडी सहित ३६ सदस्यीय नेपाली टोली बुधबार नै इराक पुगेका हुन् ।
Related