काठमाडौं। कुवेत पुगेको नेपाली फुटबल टोलीका सबै सदस्यको पीसीआर रिपोर्ट आएको छ । कुवेत पुगेको टोलीका सबै खेलाडी र अफिसियलको कोरोना रिपोर्ट नेगेटिभ आएको हो ।

नेपाली टोली इराकसँगको मैत्रीपूर्ण खेलपछि कुवेत पुगेको छ । सन् २०२२ मा कतारमा हुने विश्वकप र २०२३ मा चीनमा हुने एसिया कपको संयुक्त छनोटअन्तर्गत दोस्रो चरणको छनोटको बाँकी खेल खेल्न त्यहाँ पुगेका हुन् । टोलीका सबै सदस्यले पीसीआर परीक्षणका लागि स्वाब दिएका थिए सबै खेलाडीहरुको रिपोर्ट नेगेटिभ आएको जनाइएको छ ।

छनोटअन्तर्गत समूह बी मा रहेको नेपालले बाँकी ३ खेल कुवेतमा खेल्नेछ । नेपालले जेठ २० गते चाइनिज ताईपेई, जेठ २४ गते जोर्डन र जेठ २८ गते अष्ट्रेलियासँग खेल्नेछ । नेपालको सबै खेल नेपाली समय अनुसार राती ९ः४५ बजे सुरु हुने जनाइएको छ ।

तीनवटै टिम फिफा वरीयतामा नेपाल भन्दा माथि छन् । अष्ट्रेलिया फिफा वरीयतामा ४१औं स्थानमा छ भने जोर्डन ९५औं र चाइनिज ताइपेई १४१औं स्थानमा छ । नेपाल १७१औं स्थानमा छ ।