लिम्बुवानखबर। विश्वकप छनोट अन्तर्गत आज (बिहीबार) भएको खेलमा नेपालले चिनियाँ ताइपेईलाई हराएको छ । कुवेतमा भएको खेलमा नेपालले चिनियाँ ताइपेईलाई २–० गोलले हराएको हो ।

कुवेतको जबर अल–अहमद अन्तर्राष्ट्रिय रंगशालामा भइरहेको खेलमा नेपालले चौथो मिनेटमा पाएको पेनाल्टीलाई सही सदुपयोग गर्दै अञ्जन विष्टले गोल गरेका हुन् ।

ताइपेईका खेलाडी चेङ हाउले आफ्नो पेनाल्टी एरियामा बल ह्यान्ड गरेपछि पाएको पेनाल्टीलाई सही दिशा दिएका विष्टले सहिजलै गोल गरेका थिए अञ्जनको यो नेपालका लागि चौथो अन्तर्राष्ट्रिय गोल हो ।

त्यस्तै खेलको उत्तरार्धमा ८१औँ मिनेटमा नेपालका लागि दोस्रो गोल नवयुग श्रेष्ठले गरेका हुन् ।

एसियाली विश्वकप छनोटको समूह ‘बी’ का खेल तटस्थ भूमिका रूपमा कुवेतमा भएको हो । नेपालले ताइपेईविरुद्धको पहिलो लेगको छनोटमा पनि २–० को जितनै निकालेको थियो । त्यसमा दुवै गोल अञ्जनले नै गरेका थिए ।

नेपालका लागि नवनियुक्त कुवेती प्रशिक्षक अब्दुल्लाह अलमुताइरीको यो पहिलो औपचारिक खेल हो । यसअघि उनको नेतृत्वमा नपालले इराकसँग मैत्रीपूर्ण अन्तर्राष्ट्रिय खेल खेलेको थियो । जून खेलमा नेपाल इराकसँग ६–२ गोलले स्तब्ध भएको थियो ।