१५औं संस्करणका विजेता पाेर्चुगल टिम
काठमाडौं । कोरोना महामारीका कारण एक वर्षपछि सरेको युरोपेली च्याम्पियनसिप अर्थात युरोकप २०२० शुक्रबारदेखि सुरु हुँदैछ । मिनी विश्वकपको रुपमा चिनिने युरोकपको यो १६औं संस्करण हो ।
युरो कपमा २४ टिमले प्रतिस्पर्धा गर्दैछन् । १५औं संस्करणसम्म आइपुग्दा १० देशले मात्र यो कप जितेका छन् त्यस मध्ये ९ टिमले १६औं संस्करणमा स्थान पक्का गर्दै कप उचाल्ने दाउँमा छ । पूर्व युरोकप विजेता ग्रीस यसपटक छनोट हुन सकेन ।
युरोकपको ६०औं वर्षको अवसरमा यस पटक ११ देशको विभिन्न शहरहरुमा खेल संचालन हुँदैछ । उदघाटन खेल इटली र टर्कीबीच रोममा हुनेछ भने जुलाई ११ मा लण्डनस्थित वेम्बलीमा फाइनल खेल जनाइएको छ ।
उपाधि दाबेदार भएर पनि अहिलेसम्म युरोकप जित्न नसकेका राष्ट्रहरु बेल्जियम र इंग्ल्याण्ड पनि यो पटक खेलमा छनौट भएका छन् ।
सहभागी २४ मध्ये झण्डै एक तिहाइ टिम उपाधिको दाबेदारको रुपमा छन् । साविक विजेता पोर्चुगल, विश्व विजेता र साविक उपविजेता फ्रान्स, सर्वाधिक ३ पटकको च्याम्पियन जर्मनी र स्पेन अनि विश्व वरीयताको शीर्ष स्थानमा रहेको बेल्जियम प्रमुख दाबेदारको रुपमा छन् । यस्तै इंग्ल्याण्ड, एक पटकको विजेता इटली र नेदरल्याण्ड्स पनि उपाधि दाबेदारकै रुपमा छन् ।
पूर्व च्याम्पियनमध्ये डेनमार्क, रसिया र चेक रिपब्लिकलाई उपाधि दाबेदारको रुपमा हेरिएको छैन । डेनमार्क र नेदरल्याण्ड्स २०१६ मा छनोट हुन नसके पनि यस पटक पुनरागमन गरेका छन् ।
पोर्चुगल, फ्रान्स र जर्मनी एउटै समूहमा रहेकाले एक पूर्व विजेताको यात्रा समूह चरणबाटै समाप्त हुन पनि सक्छ । तर ६ वटै टिमको शीर्ष दुई टिमसँगै तेस्रो हुनेमध्ये चार टिम पनि प्रिक्वाटरफाइनलमा पुग्ने भएकाले तीनवटै टिम नकआउट पनि पुग्न सक्छन् । त्यसका लागि सबै ६ टिमको नतिजा र अन्य समूहको नतिजा निर्णायक हुनेछ जनाइएको छ ।
Related