काठमाडौं । फिलिपिन्समा आयोजना हुने एसियन महिला भलिबल च्याम्पियनसिपमा नेपालसहित १२ टिमको सहभागिता हुने भएको छ । जुन १५ तारिखसम्म टिम इन्ट्री गर्ने समय रहेकोमा ५ देशले खेलमा सहभागी नहुने भएका छन् ।

कोरोना महामारीका कारण देखाएर न्यूजिल्याण्ड, चीन, इन्डोनेशिया, श्रीलंका र भेयतनामले प्रतियोगिताबाट नाम फिर्ता लिएका छन् । यो प्रतियोगिता चीनमा आयोजना गर्ने भनिए पनि चीनले आयोजना गर्न अस्वीकार गरेपछि फिलिपिन्समा सारिएको हो ।

नेपालले बंगलादेशमा भएको एभीसी सेन्ट्रल जोनको उपाधि जितेको थियो । यो जोनबाट नेपालसहित इरान, काजकिस्तान र भारत पनि एसियन च्याम्पियनसिप खेल्ने छन् ।

अगष्ट २९ देखि सेप्टेम्बर ५ सम्म आयोजना हुने प्रतियोगिताका लागि नेपाली महिला भलिबल टिमले तयारी भने शुरु गरिसकेको छ । त्यसका लागि नेपाल भलिबल संघले ३० जना खेलाडीलाई बन्द प्रशिक्षणमा राखेर विहान र बेलुकी दुई सिफ्टमा प्रशिक्षण दिईरहेको जनाएको छ ।

प्रतियोगितामा सहभागी १२ टिममा नेपाल सहित फिलिपिन्स, जापान, दक्षिण कोरिया, काजकिस्तान, चाइनिज ताइपेई, इरान, थाइल्याण्ड, अस्ट्रेलिया, भारत, हङकङ र थाइल्याण्ड रहेका छन् ।